چاڤدێرێن سیاسی: هەتا نها تورکیا ب کریار بۆ چارەسەریێ چو نەکریە
چاڤدێرێن سیاسی دیار دکەن، پشتی گرۆپەک ژ چەکدارێن پەکەکێ چەکێن خوە ژناڤبرن خەلک چاڤەرێ بوو هەر چ نەبیت زمانێ بەرپرسێن دەولەتێ بهێتە گوهۆڕین، لێ مخابن هەتا نها ژی ئەو دبێژن تورکیایەک بێ تیرۆر و ئەو یەک ژی بوویە جهێ دلگرانیا کوردان.
حەسەن بیلدرجی چاڤدێرێ سیاسی دیار کر، پشتی گرۆپەک ژ چەکدارێن پەکەکێ چەکێن خوە ژناڤبرن، کورد ل تورکیا چاڤەرێ بوون هەر چ نەبیت د پێنگاڤا ئێکێ دا ئەردۆغان و بەرپرسێن دی یێن دەولەتێ بێژن قووناغا چارەسەریێ، لێ مخابن هەتا نها ژی ئەو دبێژن تورکیایەک بێ تیرۆر و بەری دو رۆژان ئەردۆغانی دیار کر وان ل گەل چو کەسەک دانوستاندن نەکرینە و دێ شەڕێ وان ل دژی تیرۆرستان بەردەوام بیت و گۆت: (مخابن هێشتا ژی زمانێ ئەردۆغانی و بەرپرسێن دی یێن دەولەتێ ل هەمبەر کوردان گەلەک توندە، هەتا نها ژی بەحسێ چارەسەریێ ناکەن، بەری دو رۆژان ل ئستەنبولێ ئێرشی کوردان کرن، کو گۆهداریا موزیکا کوردی کرینە، ئەو یەک ژی بێگومان بوویە جهێ دلگرانیا هەموو کوردان، چونکی کورد چاڤەرێ نە دەولەتا تورکیا ب کریاری بسەلمینیت، کو وێ ژی ئاشتی و چارەسەرکرنا پرسا کوردی دڤێت، لێ مخابن هەتا نها تشتەک وەسا نینە).
عەلی بایرام چاڤدێرێ سیاسی ژی دیار کر، بریارا ژناڤبرنا چەکان ژ ئالیێ گرۆپەک ژ چەکدارێن پەکەکێ ڤە، سەلماند گەلێ کورد ل تورکیا ل دژی شەڕی نە و کوردان ئاشتی دڤێت، لێ مخابن هەتا نها ژ ئالیێ دەولەتا تورکیا ڤە چو نەهاتیە کرن، نابیت هەموو تشت ل سەر کیستێ کوردان بیت، دڤێت تورکیا ژی ب کریاری کار بۆ ئاشتیێ بکەت، هەتا نها دەولەتا تورکیا چو نەکریە و ژ بەر ڤێ یەکێ ژی باوەریا کوردان ب دەولەتا تورکیا ناهێت و گۆت: (د پێنگاڤا ئێکێ دا دڤێت دەولەتا تورکیا گەلەک گرتیێن سیاسی ئازاد بکەت، دڤێت قەدەغەیێن ل سەر زمانێ کوردی نەمینیت، دڤێت زمانێ بەرپرسێن تورکیا ل هەمبەر کوردان بهێتە گوهۆڕین، لێ مخابن هەتا نها تشتەک وەسا نینە و ئەو یەک ژی بوویە جهێ دلگرانیا هەموو کوردان ل تورکیا، چونکی ئاشتی ب تنێ ژ ئالیێ هێزەکێ ڤە ناهێتە کرن، دڤێت هەر دو ئالی یا پێدڤی بۆ ئاشتیێ بکەن، لێ مخابن هەتا نها ژ ئالیێ دەولەتا تورکیا ڤە چو نەهاتیە کرن).
هژمارەک زێدە ژ چاڤدێرێن سیاسی ل تورکیا و باکورێ کوردستانێ ژی داخواز دکەن لیژنەیا پەرلەمانێ تورکیا هەر زوو بهێتە پێکئینان و دەست ب کارێن خوە بکەت، چونکی هەتا ب کریاری ژ ئالیێ دەولەتا تورکیا ڤە هندەک تشت نەهێنە کرن، باوەریا کوردان ب سۆزێن دەولەتێ ناهێت.