ڤەهێل کەلەش: حەزا وەرزشێ وە کر ببمە کۆمێنتار
نەرمین ڕێکانی
د دیدارەکا تایبەت دا ڤه‌هێل مسته‌فا عه‌باس یێ ناڤدار ب ڤه‌هێل كه‌له‌ش كومێنتارێ وه‌رزشی ل پارێزگەها دهۆکێ دیارکر هه‌ر كه‌سێ حه‌ز لسه‌ر كاره‌كی هه‌بیت دێ شێت باشتر کارێ خوە بڕێڤەبەت و حەزژێکرنا وە بۆ وەرزشێ وەکر ببیتە کۆمێنتار.
زێدەتر ناڤهاتی بۆ رۆژنامەیا ئەڤرۆ گۆت: ل سالا 2011 دەست بکارێ راکەهاندنێ کرییە، ل سالا 2012 چوویمه كه‌نالێ داسنیا كۆمێنتارییا وه‌رزشی ل سالا 2014 ئێكه‌م جار ل مۆندیالێ من كارێ كومێنتاریێ كر، هه‌ر ژ وێ رۆژێ من كارێ خۆ پێشئێخستیە و بوویمه رێك خوشكه‌ر كو چه‌ندین هه‌ڤالێن من بهێنه دناڤ ڤی كاری دا و پێكڤه خێزانا كومێنتارییا بزمانێ دایكێ ل بادینان پێكبینین .
و هەروەسا ڤەهیلی گوت: ئێكه‌م كه‌س بووم كومێنتارییا وه‌رزشی ل كه‌نالێ شەباب سبورت بکەم کو کەنالەکێ عەربی یە، لده‌ستپێكێ من گه‌له‌ك زه‌حمه‌تی دیت و بشیانێن خۆ یێ كه‌سوكی گه‌هشتمه یا نوكه ئه‌ز لێ، گه‌له‌ك كه‌سان هاریكارییا من كرییه لێ به‌رامبه‌ر وان گه‌له‌كێن دی هه‌بووینه دژایه‌تییا من و كارێ من كرییه ، لێ هه‌ر چه‌وا بیت ئه‌م شیاین بسه‌ركه‌ڤین و هه‌موو دهۆكی و كوردستانی دیده‌ڤانن .
ژلایەکێ دووڤە ڤەهیل کەلەشی گۆت ژی: هه‌ر په‌یڤه‌كا دكارێ خۆدا بكاردئینم ئه‌ز دنڤیسم و هه‌كه هه‌ڤال ژی هاریكارییا من بكه‌ن كارێ من زه‌نگینتر لێدكه‌ن لێ تشتێ خۆش ئه‌وه یێ دناڤ یاریێ دا روودده‌ت دبیته باشترین كه‌رسته بۆ كارێ من، چ لسه‌ر یاریزانان بیت یان راهێنه‌ر و دادڤانان یانژی لسه‌ر تیمان، بۆ ڤێ یه‌كێ دڤێت هه‌می ده‌ما كومێنتار یێ به‌رهه‌ڤ بیت داكو یاریێ ژده‌ست نه‌ده‌ت.
لدووماهیێ ناڤهاتی گوت: زمانێ كوردی یێ زه‌نگینه و هه‌كه مروڤ كارلسه‌ر بكه‌ت دێ هێشتا خۆشیێ ده‌ته ڤی كارێ خۆش، یا كارێ كومێنتارییا وه‌رزشی گه‌هاندییه من حەز‌ژێكرنا خه‌لكی بوویه و بۆ من شانازییه نها ل پترییا باژێرێن كوردستانێ كه‌سه‌كی دنیاسن كو دبێژنێ ڤه‌هێل کەله‌ش، ئه‌ز و هه‌ڤالێن خۆ یێ كومێنتار شیاین وه‌بكه‌ین به‌رێ خه‌لكی و پشته‌ڤانان ژ كومێنتارییا زمانێن دی بۆ زمانێ كوردی یێ شرین ب گوهۆڕین و ژمنڤه ئه‌ڤه پیروزترین په‌یاما مه‌بوویه و تا راده‌یه‌كێ مه‌زن ئه‌م بسه‌ركه‌فتینه.
