كۆپا ئیراقێ 2025 کوردستانی یە
قەیس وەیس:
چاڤەڕێ دهێتە كرن سوبەهی رۆژا هەینی ل یاریگەها شەعب یا نێڤدەولەتی یارییا فینالا كۆپا ئیراقێ یا فوتبۆلێ دناڤبەرا هەردو یانەیێن پارێزگەهێ دهۆك و زاخۆ ئەوا دێ ل دەمژمێر هەشتی شەڤ ب بەرهەڤبوونا هژمارەكا ئێكچار زوور ژ جەماوەرێن هەردو یانەیان.
دهۆكێ ناسناڤەكێ دی دڤێت
پشتی ب دەستڤە ناسناڤێ كۆپا كەنداڤی یانەیا دهۆك ڕژدە ل سەر دەستڤەئینانا ناسناڤێ كۆپا ئیراقێ، د. عەبدوللا جەلال د داخویانیەكا رۆژنامەڤانی دا گۆت: ئەڤ ناسناڤە بۆ مە گەلەك گرنگە و ئەم دێ هەموو بزاڤان كەین ژ دەست نەدەین هەموو یاریزان ژی دڕژن بۆ ئارمانجا مە، بۆ مە هند گرنگ نینە یاری ل كیش یاریگەهێ بیت بەلكۆ سلامەتییا جەماوەری و یاریزانان ژ هەر ناسناڤەكی گرنگترە.
ژبەر چامپیۆنزا ئاسیا زاخۆ چاڤ ل ناسناڤییە
تیما دویێ یا بەهدینان و پارێزگەها دهۆكێ یانەیا زاخۆ ئەوا هەموو بزاڤان دكەن ئەڤی ناسناڤی ب دەستڤە بینت ژبۆ ئارمانجا خوە یا مەزن ئەوژی پشكدارییە د چامپیۆنزا ئاسیا دا، ئەڤ یارییە بۆ زاخۆییان مان و نەمانە و چاڤ ل تۆماركرنا دیرۆكەكا مەزنن كو دێ بیتە جار ئێكێ د دیرۆكا ڤێ یانەیێ دا، د داخویانیەكا رۆژنامەڤانی دا عەبدولغەنی شەهەد ڕاهێنەر زاخۆ گۆت: یارییا وان ب سانەهی نابیت لێ هەموو یاریزانان سۆزدایە تا دووماهی خولەك شەڕی بۆ ناسناڤی بكەن.
شرۆڤەكارەكێ وەرزشی بۆچوونا خوە هەیە
ل دۆر ڤێ یاریێ سلێمان كانیكی شرۆڤەكار و چاڤدێرێ وەرزشی بۆ رۆژنامەیا ئەڤرۆ گۆت: جارێ دوور ژ وێ چەندێ كی دێ بیتە قارەمان، بۆ مە گەلەك گرنگە ئەم هەردو یانەیێن خوە یێن پارێزگەهێ و كوردستانێ د فینالا كۆپا ئیراقێ دا ببینن، ئەڤەژی دەستكەڤتە بۆ وەرزشا پارێزگەهێ و كوردستانێ، یا دویێ ژی گرنگ ئەوە یارییەكا جوان و پشتەڤانیەكا سەردەمانە ژلایێ جەماوەری دوور ژ توندوتیژیێ بیت، ئەو تیما پتر مفایی ژ دەلیڤەیێن خوە وەربگریت و یاریزانێن وێ ئارام بن دێ سەركەڤن و دبینم هەردو یانە دێ بۆ ناسناڤی هەڤڕكییەكا بهێز كەن، لێ بۆ مە گرنگە ناسناڤ بهێتە كوردستانێ و دەڤەرا بەهدینان، دخوازین جەماوەر سەر خوەبن و پشتەڤانییەكا جوان و شارستانی بكەن.
دیدارێن پێشتر و چەوا دەربازبوونە فینالێ؟
هەرچەندە هەردو یانەیێن پارێزگەهێ و كوردستانێ 15 یاریێن فەرمی یێن خولا ئیراقێ ئەنجامدابوون، 10 ژوان وەكهەڤی بوون، سێ سەركەڤتن بۆ دهۆكێ و دو بۆ زاخۆ، لێ ئەڤ یارییە جودایە ژبەر دێ بۆ ناسناڤی بیت و دبیتە جارا ئێكێ د دیرۆكا خوە دا و ل سەر ئاستێ یانەیێن كوردستانێ و ئیراقێ هەردو یانەیێن دەڤەرا بەهدینان و دەرڤەیی پایتەختێ ئیراقێ تیما دهۆك و زاخۆ دەربازبنە یارییا فیناڵ پشتی شیایین د یاریێن خوە یێن پێش دووماهیێ دا ب سەركەڤتن ل سەر یانەیێن بەغدایی تیما جەوییە و تیما شورتە و دەربازنە فینالێ.
د قۆناغا پێش دووماهیێ دا تیما ئەلهۆیێن چیا ب سێ گۆلان بەرانبەر گۆلەكێ سەركەڤتنێ ل سەر مێڤانا خوە یانەیا جەوییە ئینا، ژلایێ خوەڤە كوڕێن خابووری ل سەر كیستێ قارەمانا ئیراقێ یانەیا شورتە دەربازبوو یارییا دووماهییا كۆپایێ.
بۆ زانین كۆپا ئەڤ سالە دبیتە یا 26ێ دهێتە كرن، یانەیا زەورا پترترین ناسناڤ ب دەستخوەڤەئیناینە كو 15 جاران بوویە قارەمان، جەوییە چار جاران، هەر ئێك ژ تەلەبە، ئەلرەشید، جەیش جودا دو ناسناڤ ئیناینە و سیناعە جارەكێ بوویە قارەمان.
