دهۆكێ دیرۆك تۆماركرەڤە، ئێكەم یانە و ڕاهێنەرێ كوردستانی كۆپا ئیراقێ ب دەستڤە ئینا
قەیس وەیس:
پشتی ناسناڤێ كۆپا كەنداڤی بۆ جارا ئێكێ د دیرۆكا خوە و ل سەر ئاستێ كوردستانێ و هەموو پارێزگەهێن ئیراقێ دا تیما فوتبۆلا یانەیا دهۆك ناسناڤێ كۆپا ئیراقێ ب دەستڤە ئینا پشتی شیایی د یارییا فینالێ دا ب سەركەڤیت ل سەر یانەیا زاخۆ ب لێدانێن پەنەلتییان 5-3 گۆلان، پشتی ب دووماهی هاتنا هەردو نیڤان دگەل هەردو چارێكێن یاریێ بێ گۆل، د یارییا واندا ئەوا ل شەڤا ئەینیا بۆری ل یاریگەها شەعب ل پایتەختێ ئیراقێ بەغدا ب بەرهەڤبوونا هژمارەكا ئێكچار زوور یا پشتەڤانێن هەردو یانەیێن بەهدینان.
فینال و ناسناڤێ كوردستانی بوو
ب ڤێ هەلەکفتنێ سەرۆک بارزانی پەیاما پیرۆزباهیێ بەلاڤکر: پیرۆزباهیەکا گەرم ل هەردو یانەیێن دهۆک و زاخو دکەم بۆ ڤێ سەرکەفتنێ یا بدەست ڤەئینای، گەهشتنا هەوە بۆ یاریا دوماهیێ جهێ دەست خوەشیێ و سەرکەفتنا کوردستانێ یە. یارییا دووماهییا كۆپا ئیراقێ دبتە جارا ئێكێ د دیرۆكا خوە دا دو یانەیێن ئێك پارێزگەهـ و كوردستانی هەڤڕكیێ بۆ ناسناڤی بكەن و ئێكەم جارە د دیرۆكا كۆپایێ دا یانەیەكا دەرڤەیی پایتەختێ ئیراقێ ناسناڤی ببەت، دیسان یانەیا دهۆك ئێكەم یانەیە ل سەر ئاستێ ئیراقێ و كوردستانێ دو كۆپا د ئێك وەرز دا ب دەستڤە بینت ئەوژی، كۆپا كەنداڤی و كۆپا ئیراقێ.
سلێمان ڕەمەزان ئێكەم ڕاهێنەرێ كوردە
كوڕێ باژێرێ دهۆكێ و ڕاهێنەرێ تیما یانەیا دهۆك سلێمان رەمەزان دبیتە ئێكەم ڕاهێنەرێ كوردستانی و ماوەیەكێ كورت دا دناڤبەرا ١٩ رۆژان دا تیما دهۆكێ ب گەهینە یارییا فینالێ و ناسناڤێ كۆپایێ ژی ب دەستڤە بینت دیسان ئێكەم ڕاهێنەرێ كوردستانی یە ناسناڤەكێ ئیراقێ ب دەستڤە بینت، بۆ زانین سێلمان رەمەزان خودانێ باوەرنامەیا پرۆ یا ئاسیاییە و چەندین دەستكەڤتێن كوردستانی بۆ یانەیێن زێرەڤانی، دهۆك و زاخۆ ئیناینە و د نوكە ژی دا ڕاهێنەرێ هەلبژارتیێ كوردستانێ یە.
كێ خەلاتێن كەسۆكی برن
د ڕێورەسمێن بەلاڤكرنا خەلاتان دا ژبلی ب دەستڤە ئینانا ناسناڤێ كۆپایی، یاریزانێن دهۆكێ هەموو خەلاتێن كەسۆكی یێن قارەمانییا كۆپایی ب دەستڤە ئینان و بڤی شێوەیی، پیشەكارێ دهۆكێ یێ كوتیڤۆاری یانیك زاكێری بوو باشترین یاریزانێ یارییا فینالێ، محەمەد سالح گۆلپارێزێ دهۆكێ ناسناڤێ باشترین گۆلپارێزێ قارەمانیێ ب دەستڤە ئینا، ژلایێ خوەڤە ژی كەریم دەرویش یاریزانێ لوبنانی یێ یانەیا دهۆكێ بوو باشترین یاریزانێ قارەمانیێ و گۆلكەرێ قارەمانیێ ب پێنچ گۆلان.
دهۆكێ پشكدارییا ئاسیا ژ دەستدا
سەرباری تیما فوتبۆلا یانەیا دهۆك بوو قارەمانا كۆپا ئیراقێ ئەوا ل دووڤ ڕێنمایێن فدراسیۆنا فوتبۆلا ئیراقێ ئەو تیما دبیتە قارەمان ئێكسەر دێ پشكداریێ د قارەمانییا ئاسیا دا كەت، لێ ژبەركو یانەیا دهۆك ڕێپێدانا ئاسیایی نە وەرگرت، پشتی فدراسیۆنا ئاسیا بادەكا وێ یا ڕێپێدانی ڕەدكری ژبەر چەند كێماسییان، ب فەرمی یانەیا زەورا خودانا ڕێزا دویێ د خولا ستێرێن ئیراقێ دا دێ پلێتا دەربازبوون ل پێش یانەیا دهۆكێ بۆ قارەمانییا ئاسیا دو وەرگرتیە، هەرچەندە دهۆك یا بزاڤێ دكەت ڕێپێدانا خوە دۆبارە ڤەگەڕینیت.
زاخۆ دێ پشكداریێ د كەنداڤی دا كەت
ل دووڤ ڕێنمایێن فدراسیۆنا فوتبۆلا ئیراقێ پشكدارییا یانەیا زاخۆ دێ بۆ قارەمانییا كۆپا كەنداڤی بۆ وەرزێ ئەڤ سالە ل جهێ یانەیا زەورا بیت ئەوا قارەمانییا ئاسیا مسۆگەر كری، ژلایەكێ دووڤە یانەیا شورتە قارەمانا وەرزێ ئەڤ سالە یا خولا ستێرێن ئیراقێ دێ پشكداریێ د چامپیۆنزا ئاسیا ئێك دا كەت.
نێچیرڤان بارزانی پیرۆزباهییا خوە گەهاند
نێچیرڤان بارزانی پەیاما خوە بڤی شێوەیی بەلاڤكرییە، ژ دل و ب گەرمی پیرۆزباهیێ تیما دهۆك یا فوتبۆلێ دكەم كو بوو ئێكەما كۆپا ئیراقێ، هەروەسان پیرۆزباهیی ل تیما زاخۆ دكەم كو پلەیا دویێ ب دەستڤە ئینایی، دەستخوەشیێ لێ دكەم و هیڤییا سەركەڤتنێن بەردەوام بۆ وان د خوازم، گەهشتنا هەردو تیمێن دهۆك و زاخۆ بۆ ڤێ جهێ دلخۆشی و شانازییا هەمی كوردستانییانە، هیڤیدارین ئەڤ ئاست و سەركەڤتنە گیانێ وەرزشی ل كوردستانێ و ئیراقێ ب گشتی ب هێزتر بكەن، هەر هەبن سەركەڤتی بن.
مەسرۆر بارزانی پەیاما خوە گەهاند
پیرۆزباهیێ ل هەردو یانەیێن دهۆك و زاخۆ دكەم، بۆ ب دەستڤە ئینانا پلەیا ئێك و دو یا كۆپا ئیراقێ و هیڤییا سەركەڤتنا بەردەوام بۆ هەردو یانەیان د خوازم، گرنگ ئەوە كوردستان ب سەرگەڤت.
پارێزگارێ دهۆكێ ژی پەیام هەبوو
پیرۆباهییا گەرم ل یانەیا دهۆك و پشتەڤان و هەموو خەلكێ هەرێما كوردستانێ دكەم و هەروەسان دەستخووەشیێ و داخوازا بەختەكێ باشتر بۆ یانەیا زاخۆیا برا و پشتەڤانێن وێ د خوازم، یا گرنگ ەوە بوو ئەڤ كۆپایە ل كوردستانێ و ل پارێزگەها دهۆكێ مافە و كوردستان ب سەركەڤت، سوپاس بۆ پشتەڤانێن هەردو لایان كو ب گیانێ وەرزشی و برایینیا خۆ ل بەغدا نیشان دا.
گۆهدار شێخۆی پەیاما خۆ بەلاڤكر
ژلایێ خوەڤە گۆهدار شێخۆ سەرپەرشتێ ئیدارا سەربەخۆیا زاخۆ بەلاڤكرییە، ب هەلكەڤتا یارییا دووماهیێ ژ كۆپا ئیراقێ دناڤبەرا زاخۆ و دهۆكێ دا ئەم پیرۆزباهیێ و دەستخوەشیێ ل هەردو یانەیان دكەین و هەروەسان سۆپاسییا جەماوەرێ دلسۆرزێ یانەیا زاخۆ دكەین بۆ ماندیبوون و پشتەڤانییا وان یا بەردەوام، هیڤییا سەركەڤتنێ بۆ هەردو یانەیان د خوازین، پیرۆزە ل هەمی كوردستانێ.
عەدنان درجال: پیرۆزباهییا دهۆكێ دكەم ژ هەژی بوون
ژلایێ خوەڤە عەدنان درجال سەرۆكێ فدراسیۆنا فوتبۆلا ئیراقێ پیرۆزباهیێن خوە ئاراستەیی یانەیا دهۆكێ كر و گۆت: ب دەستڤە ئینانا دهۆكێ بۆ كۆپا ئیراقێ پشتی هەڤڕكییەكا دژوار دهێتە هژمارتن دەستكەڤتەكێ شانازی بۆ یانەیێ پشتی 120 خولەكێن یاریێ و ب پەنەلتییان ئێكلابووی، پیرۆزباهیێ ل كارگێرییا یانەیا دهۆكێ دكەم ئەوا ب ڕژدی و پلان و بەرنامە كار ل سەركری هەتا گەهشتینە ئارمانجا خوە، دیسان كادرێ ڕاهێنانێ ئەوا شیاین ئاستێ یاریزانێن خوە بهێزبێخن، دیسان پیرۆزباهیێ ل یانەیا زاخۆ ب كادرێ راهێنانێ دكەم ئەوێن هەموو شیانێن خوە تەرخانكرین، هەڤڕكییەكا ب سەرفەراز و گیانەكێ مەزن یاری دكرن، سۆپاسییا جەماوەرێ هەردو یانەیان دكەین كو وێنەیەكێ جوان دناڤا یاریگەها شەعب دا نیشان دا.
بۆ زانین كۆپا ئەڤ سالە دبیتە یا 26ێ دهێتە كرن، یانەیا زەورا پترترین ناسناڤ ب دەستخوەڤەئیناینە كو 15 جاران بوویە قارەمان، جەوییە چار جاران، هەر ئێك ژ تەلەبە، ئەلرەشید، جەیش جودا دو ناسناڤ ئیناینە و سیناعە جارەكێ بوویە قارەمان.
