پێدڤیە گـه‌لێن سـووریێ بریارێ ل دۆر پاشـه‌رۆژا خـوه بده‌ن
وەزارەتا دەرڤە یا ئەمریکا راگەهاند وان دڤێت رەوشا رۆژهەلاتا ناڤین یا ئارام بیت، ب تایبەتی ژی گەلەک گرنگە رەوشا سووریێ ئارام بیت و بێگومان سەبارەت ب سیستەمێ نوو یێ سووریێ ژی دڤێت گەلێن سووریێ بریارێ ل دۆر پاشەرۆژا خوە بدەن.
تامی بروس په‌یڤدارا وه‌زیرێ ده‌رڤه یا ئه‌مریکا راگه‌هاند، کو وان دەست ب بزاڤەکا مەزن کرینە دا رەوشا رۆژهەلاتا ناڤین یا ئارام بیت، ب تایبەتی ژی ئارامیا ل سووریێ ژ بۆ ئەمریکا گەلەک یا گرنگە و گۆت: (گەلەک کەس بەحسێ ڤێ یەکێ دکەن کا دێ سیستەمێ بهێت یێ برێڤەبرنا سووریێ چاوا بیت و گەلەک کەسان ئەڤ پرسیارە ژی کریە کا ئەمریکا سیستەمەک چاوا ژ بۆ پاشەرۆژا سووریێ دڤێت، مە دڤێت ل ڤێرێ ئاشکرا بکەین، کو دڤێت گەلێن سووریێ پێکڤە بریارێ ل دۆر پاشەرۆژا خوە بدەن، ئەمریکا رێزێ ل هەر بریارەکێ دگریت، کو گەلێن سووریێ پێکڤە ژ بۆ پاسەرۆژا خوە بدەن).
ل ئالیێ دی رۆژنامەیا واشنتۆن پۆست د راپۆرتەکێ دا بەحسێ ڤێ یەکێ کریە، د چەند رۆژێن بۆری دا وەزارەتا دەرڤە یا ئەمریکا داخواز ژ بالیۆز و نوونەرێن خوە یێن ل وەلاتێن رۆژهەلاتا ناڤین کریە، سەبارەت ب پاشەرۆژا سووریێ چو داخویانیان نەدەن، چونکی نها رەوشا سووریێ گەلەک یا هەستیارە و هەر داخویانیەک ب ناڤێ ئەمریکا بهێتە دان دبیت ببیتە ئەگەرێ روودانا ئالۆزیێن نوو و ئەو یەک د بەرژەوەندیا ئەمریکا دا نینە.
د ڤێ دەربارێ دا چاڤدێرێن سیاسی ژی دیار دکەن، بەری نها تۆم باراک نوونەرێ تایبەت یێ سەرۆکێ ئەمریکا بۆ کاروبارێن سووریێ ب داخویانیێن خوە یێن، کو دژبەریا فیدرالیێ بۆ سووریێ کربوو ئالۆزی دروست کرن، کورد و دورزی ب توندی هەلوەستێ تۆم باراکی رەت کرن و هەلوەستێ نوونەرێ ئەمریکا بۆ ئەگەرێ ڤێ یەکێ هێزێن توندرەو ل سووریێ ئێرشی دورزیان بکەن، ژ بەر ڤێ یەکێ ژی نها ئەمریکا راستیا هەی دیت و ئێدی ئەمریکا پشتەڤانیێ ل سیستەمەک ناڤەندی ل سووریێ ناکەت و ژ بەر ڤێ یەکێ ژی ئەمریکا دڤێت خوە نەکەتە پشکەک ژ ئالۆزیێن نها ل سووریێ و ئەمریکا دڤێت خەلکێن سووریێ بریارا خوە بدەن، ئەو یەک ژی نیشا ددەت ئەمریکا سیاسەتا خوە سەبارەت ب پاشەرۆژا سووریێ گوهۆڕیە و ئەو یەک ژی بێگومان د بەرژەوەندیا کوردان دایە.
هه‌ر د ڤێ مژارێ دا سالح موسلیم ئه‌ندامێ سه‌رۆکاتیا پارتا ئێکەتیا دیموکرات ژی راگه‌هاند، کو وان بۆ ئازادیا سووریێ ب گشتی و ب تایبەتی ژی ژ بۆ گەلێ کورد خه‌باته‌کا مه‌زن کرینه و گۆت: (دڤێت ئه‌مریکا و هه‌ر ئالیه‌ک بزانیت ئەم نابینە پشکه‌ک ژ سیسته‌مێ جیهادی ل سووریێ، گه‌لێ کورد ل باکورێ سووریێ داخوازا سیستەمەک دیموکراتی بۆ هەموو سووریێ دکەت و د رەوشا نها دا کورد ب چو رەنگەکێ دەست ژ چەکێن خوە بەرنادەت، دڤێت هەموو ئالی کار بۆ ئاڤاکرنا سووریایەک نوو و دیموکراتی بکەن).
