رێگریێ ل ژناڤبرنا شوونوارێن مەسیحییان ل نەجەفێ بكە
لویس ساكۆ، كاردینالێ كەنیسەیا كلدانی ل ئیراقێ و جیهانێ داخواز ژ محەمەد شیاع سودانی، سەرۆك وەزیرێن ئیراقێ كر گۆڕستانێن دیرۆكی یێن مەسیحییان ل پارێزگەها نەجەفێ بپارێزیت و رێك نەهێتە دان جهێ وان ببنە پرۆژەیێن وەبەرئێنانێ.
ئەو داخوازییا لویس ساكۆی د بانگەوازییەكێدا بوو كو بەری چەند رۆژان ژ ئالیێ كەنیسەیا كلدانی ل ئیراقێ و جیهانی هاتیە بەلاڤكرن.
د بانگەوازیێدا هاتیە» ژ ژێدەرێن باوەرپێكری ل نەجەفا پیرۆز گەهشتیە مە كو بزاڤەك هەیە گۆڕستانێ دیرۆكی یێن مەسیحییان ل دەوروبەرێن باژێری رادەستی وەبەرئێنانێ بهێتە كرن، لەوما قەداسەتا پتریارك كاردینال لویس ساكۆ بانگەوازییەك ئاراستەی سەرۆك وەزیران كریە بۆ راگرتنا وان جۆرە زێدەگاڤییان ل سەر پێگەهێن پیرۆز یێن مەسیحییان».
ئەو جهێ كاردینال لویس ساكۆ داخوازا پاراستنا وان كری، هەر ئێك ژ (گورستانا مەزنازیرە) كو گۆڕێ پاتریاركێن دیار تێدایە ل گەل گوڕستانا ئەوم خەشم ل نەجەفێ.
لویس ساكۆ دبێژیت» پێدڤییە ئەڤ شوونواریە بهێنە پاراستن و پەرژانكرن و رازیبوون نەهێتە دان بۆ دروستكرنا پرۆژەێن وەبەرئێنانا كەرتێ تایبەت ل جهێ وان، كو دێ شوونوارێن وان ب تمامی هێنە ژناڤبرن».
زێدەتر ژ 33 شوونوارێن مەسیحییان ل نەجەفێ هەنە كو هندەك ژوان كارێن پشكنینێ ب تمامی بۆ نەهاتیە كرن.
د بانگەوازیێدا ئاماژە ب وێ چەندێ هاتیە كرن ئەو شوونوارە مل ب ملێ مەزارگەهێن شیعەیان ل نەجەفێ و كەربەلایێ و جهێن دی، وەستگەهێن حەجێ نە كو دشیاندایە ب شێوەیەكێ دروست وەبەرئێنان تێدا بهێتە كرن، بۆ وێ چەندێ د پاشەڕۆژەكا دوور دا ببنە جهێن گەشتیاری و ئایینی بۆ سەرەدانێ، كو داهاتییەكێ مەزن بۆ وەلاتێ دێ دابین كەن.
