ئەمریکا سەبارەت ب دورزیان هۆشداریێ ددەتە شامێ
وەزیرێ دەرڤە یێ ئەمریکا ب رێیا تەلەفۆنێ ل گەل ئەحمەد شەرع سەرۆک کۆمارێ سووریێ ئاخڤی و دیار کر، دڤێت حوکمەتا شامێ ئێرشێن هۆزێن عەرەب یێن ل دژی دورزیان بدەتە راگرتن، ئێرشی ل سوەیدا ب چو رەنگەکێ ناهێنە قەبوول کرن و هەکە شام د دەمەکێ کورت دا ئێرشێن هۆزێن عەرەب نەدەتە راگرتن ئەو یەک دێ بیتە ئەگەرێ ئالۆزیێن گەلەک مەزن و د رەوشەکا وەسا دا ئەمریکا پشتەڤانیێ ل حوکمەتا نوو یا شامێ ناکەت.
ل گۆر رۆژنامەیا واشنتۆن پۆست ئەحمەد شەرع سەرۆک کۆمارێ سووریێ ژی دیار کریە، ئەو کار بۆ ئاگربەستەکا دەمدرێژ ل سوەیدا دکەن، لێ مخابن هندەک هێزێن چەکدار گوهداریا حوکمەتێ ناکەن و ئەو یەک ژی نها بوویە ئاریشەیەکا گەلەک مەزن.
چاڤدێرێن سیاسی ژی دیار دکەن، ئێرشێن ل سوەیدا نیشا دا لەشکرێ سووریێ ژ کۆمەکا چەکداران پێکهاتیە و نها ئەحمەد شەرع ژی نەشێت کۆنترۆلا کۆمێن چەکدار یێن ل سووریێ بکەت و رەفتارێن گرۆپێن چەکدار ل دژی دورزیان هەمان رەفتارێن داعشێ بوون، ژ بەر ڤێ یەکێ ژی نها جڤاکێ نێڤدەولەتی ژ رەوشا سووریێ گەلەک دلگرانە و هەکە رەوش وەسا بەردەوام بیت دێ سووریێ تووشی شەڕەکێ مەزن یێ ناڤخوەیی بیت.
