دەم پارتی بۆ سەرکەفتنا قووناغا ئاشتیێ دێ یا پێدڤی کەت
هەڤسەرۆکێ دەم پارتی دیار دکەت، وەکو دەم پارتی ئەو یا پێدڤی ژ بۆ سەرکەفتنا قووناغا ئاشتیێ دکەن و پەکەکێ ژی نیەتا خوە یا پاک بۆ سەرکەفتنا قووناغا ئاشتێ نیشا دا و نها دڤێت دەولەتا تورکیا ژی ب کریاری بسەلمینیت کو وێ دڤێت قووناغا ئاشتیێ سەرکەڤیت.
تونجەر باکرهان هەڤسەرۆکێ دەم پارتی د دیدارەکێ دا ل گەل مالپەرێ T24 یێ تورکیا دیار کر، وەکو دەم پارتی ئەو یا پێدڤی ژ بۆ سەرکەفتنا قووناغا ئاشتیێ دکەن، دەم پارتی ب هەموو رەنگەکێ کار دکەت دا قووناغا ئاشتیێ سەرکەڤیت، هەتا نها ژی شاندێ ئیمرالیێ و شاندێ دەم پارتی گەلەک هەڤدیتن کرینە و ژ بۆ هەموو هێزێن سیاسی یێن تورکیا ژی دیار کرینە، کا قووناغا ئاشتیێ ژ بۆ تورکیا چەند یا گرنگە و گۆت: (د ئەنجاما شەڕێ چەندین سالان دا زیانێن گەلەک مەزن گەهشتینە تورکیا، ب هزاران وەلاتیێن سڤیل بووینە قوربانی، زیانێن گەلەک مەزن یێن ئابووری گەهشتنە تورکیا، ب سەدان گوندێن کوردان وێران بوونە، ئانکو ب کورتی مە دڤێت بێژین شەڕ د بەرژەوەندیا چو ئالیەکێ دا نینە، گەلێ تورکیا ژی ئاشتی و پێکڤەژیان دڤێت، ژ بەر ڤێ یەکێ ژی ئەم دبێژین دڤێت هەموو ئالی ژ بۆ سەرکەفتنا قووناغا ئاشتیێ کار بکەن).
هەڤسەرۆکێ دەم پارتی ئەو یەک ژی دیار کر، پرسا کوردی پرسا سەرەکی و مەزن یا تورکیا یە، ب سالانە پرسا کوردی ل تورکیا نەهاتیە چارەسەرکرن و ژ بەر ڤێ یەکێ ژی زیانێن مەزن گەهشتینە تورکیا، نها تورکیا د قەیرانەکا گەلەک مەزن یا ئابووری دایە، هەر کەس دزانیت هەتا پرسا کوردی ل تورکیا نەهێتە چارەسەرکرن، قەیرانا ئابووری ژی دێ بەردەوام بیت، ژ بەر ڤان خالان و گەلەک خالێن دی ئەم وەکو دەم پارتی دبێژین دڤێت قووناغا ئاشتیێ سەرکەڤیت و پاشی ژی بلەز کار ژ بۆ چارەسەرکرنا پرسا کوردی ل تورکیا بهێتە کرن و گۆت: (کورد چاڤەرێ نە دەولەتا تورکیا ب کریاری هندەک تشتان بکەت، مخابن هەتا نها چو نەهاتیە کرن، پێدڤی بوو د پێنگاڤا ئێکێ دا سەلاحەدین دەمیرتاش و هەڤالێن دی بهێنە ئازاد کرن، هەروەسا دڤێت هندەک قانوونێن ل دژی کوردان ژی بهێنە بگوهۆڕین، لێ هەتا نها بەرپرسێن دەولەتێ چو نەکرینە و هێشتا ژی دبێژن قووناغا تورکیایەک بێ تیرۆر، براستی ژی دڤێت ئێدی ئەردۆغان و بەرپرسێن دی یێن تورکیا بەحسێ پرسا کوردی و چاوانیا چارەسەرکرنا وێ بکەن).
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، دەم پارتیێ سەلماند ئەو هێزەکا گەلەک مەزن و کاریگەرە ل تورکیا، دەم پارتی نها ل گەل ئاکپارتیێ و پارتا بزاڤا نەتەوەپەرست کار بۆ سەرکەفتن قووناغا ئاشتیێ دکەت، لێ دەم پارتی ب چو رەنگەکێ شاشیێن دەستهەلاتێ ژی قەبوول ناکەت، دەم پارتی ژ بۆ دیموکراسیێ ل تورکیا کار دکەت و گۆت: (دڤێت هێزێن دی یێن تورکیا ژی ژ بۆ سەرکەفتنا قووناغا ئاشتیێ هاریکاریا دەم پارتیێ بکەن، سەرکەفتنا قووناغا ئاشتیێ سەرکەفتنا هەموو تورکیا یە، چونکی ب سەرکەفتنا قووناغا ئاشتیێ دێ رەوشا ئابووری یا تورکیا ژی گەلەک باش بیت، ئێدی شەڕ دێ ب تەمامی ژ تورکیا دوور کەڤیت، کورد و تورک دێ پێکڤە وەلاتێ خوە ئاڤەدان کەن و دێ تورکیا رۆژ ب رۆژێ بهێزتر لێ هێت، ژ بەر ڤێ یەکێ ژی ئەم دبێژین بلا هەموو هێزێن سیاسی ژ بۆ ئاشتیێ و سەرکەفتنا قووناغا نها هاریکاریا دەم پارتیێ بکەن).
تونجەر باکرهان بەحسێ رۆژئاڤایێ کوردستانێ ژی کر و دیار کر، هندەک ژ بەرپرسێن تورکیا دبێژن دڤێت هەسەدە ژی دەست ژ چەکان بەردەت، ئەو یەک شاشیەک گەلەک مەزنە، بابەتێ رۆژئاڤایێ کوردستانێ گەلەک جودایە، نها رەوشا سووریێ گەلەک خرابە، گرۆپێن توندرەو یێ ئێرشی گەلێ دورزی دکەن، سڤکاتیێ ب وی خەلکی دکەن و ئەو یەک ژی نیشا ددەت مەترسی ل سەر کوردان ل سووریێ هەیە، هەتا مەترسی هەبن دڤێت کورد خوە بپارێزن، ژ بەر ڤێ یەکێ ژی د رەوشا نها دا گونجای نینە بەرپرسێن تورکیا داخوازەکا وەسا ژ هەسەدێ بکەن).
هەڤسەرۆکێ دەم پارتی د دووماهیا ئاخڤتنا خوە دا ئەو یەک ژی دیار کر، دڤێت دەولەتا تورکیا ڤێ باوەریێ بدەتە کوردان، کو دێ کار بۆ ئاشتیێ و چارەسەرکرنا پرسا کوردی کەت، هێشتا ژی باوەریا کوردان ب سۆزێن دەولەتا تورکیا ناهێت، چونکی ب کریاری چو نەهاتیە کرن و ئەو یەک ژی جهێ گومانێ یە، دڤێت د پێنگاڤا ئێکێ دا گرتیێن سیاسی بهێنە ئازاد کرن و دڤێت زمانێ بەرپرسێن دەولەتێ ژی نەرم بیت، هێشتا ژی گەلەک ژ بەرپرسێن تورکیا ب توندی ل دژی کوردان دئاخڤن و ئەو یەک د خزمەتا قووناغا ئاشتیێ دا نینە و گۆت: (هەموو هێزێن سیاسی دبێژن ئەو پشتەڤانیێ ل قووناغا ئاشتیێ دکەن، لێ پشتەڤانی تنێ تێر ناکەت، دڤێت ب کریاری کار بۆ سەرکەفتنا قووناغا ئاشتیێ بهێتە کرن).
