70% وەلاتیێن دهۆكێ فۆرمێن ئەلكترۆنی پڕكرینە
دهۆك، لەزگین جوقی:
بەرپرسێ راگەهاندنا رێڤەبەریا رێكخستنا پلێتێن ئاهێن خوارنێ ل پارێزگەها دهۆكێ بۆ رۆژناما ئەڤرۆ دیار كر، هەتا نوكە ب رێژەیا 70% وەلاتیێن دهۆكێ فۆرمێن ئەلكترۆنی یێن ئاهێن خوارنێ پڕكرینە و بەردەوام خەلك فۆرمێن خۆ پڕ دكەن و دبێژیت: ل رۆژا 1/8/2025ێ پرۆسەیا پڕكرنا فۆرمێن ئەلیكترۆنی دێ ب دوماهی هێت.
قەیس وەیس، بەرپرسێ راگەهاندنا رێڤەبەریا رێكخستنا پلێتێن ئاهێن خوارنێ ل پارێزگەها دهۆكێ گۆت: «پڕكرنا فۆرمێن ئەلكترۆنی یێن ئاهێن خوارنێ ل دهۆكێ یا بەردەوامە، هەتا نوكە چو ئاریشە بۆ خەلكی پەیدا نەبووینە، ب تنێ ئەو كەسێن ژ دەرڤەی وەلاتی دەمێ فۆرما خۆ پڕ دكەن، وەكو گەشتیار دێ هێنە هەژمارتن و پشتی ژ دەرڤەی وەلاتی ڤەدگەڕن دشێن دوبارە خۆ تۆمار بكەن، ئەم حەز دكەین هەمی خەلكێ مە فۆرمێن ئەلكترۆنی پڕ بكەن، ژ بەركو هەر كەسێ هەتا 1/8/2025ێ پڕ نەكەت، نەشێت ئاهێن خوارنێ وەربگریت».
