ماندەلكرنا من مرنا تەیە
غیاس خـالد زێباری
زالبوونا هزرێن خوە سەپێنەر و شۆفینی ل ئیراقێ هەر ل دمەزراندنا وێ وەكی دەولەت، مافێن من وەكێ نەتەوا كورد ماندەل كرینە، ئەو نەتەوێ پێكهاتێ سەرەكیێ جڤاكێ ئیراقێ و خوەدی رۆلەكێ ب باندۆر د ئاڤاكرنا ئیراقێدا، ل جهێ رێزێ ل گەلێ كورد بگرن ل ماندەلكرنا مافێن خەلكێ كوردستانێ دەربازبوون بەرەڤ دژناڤبرنێ، بۆ رژێمێن شۆفینی و دكتاتۆری جهێ حیبەتیێ نیە هەوڵێن ژناڤبرنا من بدەن، چونكێ ناڤێ خوە یێ ب دوڤە، لێ جهێ حیبەتیێ ئەوە تۆ ئاڵا و درۆشمێ دیموكراسیێ و هەڤبەشیێ و پێكڤە ژیانێ بلند بكەی و خودان دەستوور و سیستەمەكێ فیدڕالی و دیموكراسی بی ، مینا دەولەتێن دكتاتۆری سەرەدەریێ لگەل پێكهاتەكێ سەرەكیێ جڤاكێ خوە بكەی و بێ گۆهداریكرنا خال و بەندێن دەستووری مافێن مللەتەكێ چەندین ملیۆنی ماندەل و بنپێ بكەی ..! جهێ پسیارێ یە ئەرێ ئەو دەسهەڵدار و ئالیێن سیاسی یێن ئیراقێ ئەوێن ئەڤرۆ ب هزرەكا شۆفینیا نەتەوە پەرستی و تائیفە گەری گەلێ كورد د بینن و سەرەدەریێ ل گەل دكەن دیرۆكا ئیراقێ نەخواندییە، چونكی هەر رژێمەكا ماندەلیا گەلێ كورد كربیت نەشیا ل دەستهەڵاتا بەردەوام بیت و د شەرێ هەڤڕكیا دگەل دا تووشی شكەستن و ناڤچوونێ بوویە، گەلێ كورد و بزاڤا رگاریخوازیا كوردستانی ژی پشتی هەر هەوڵەكا ژناڤچوونێ بهێز و ئیرادەیەكا مەزنتر ڤەگەریایە، هەر ل سەردەمێ پاشایەتی هەتا ئیراقا ئەڤرۆ . كوردستانا ئەڤرۆ جوداهیەكا زۆر لگەل بەرێ هەیە، چونكی قەوارەیەكێ قانوونی و دەستووری یە و لسەر ئاستێن هەرێمی و نیڤدەولەتی پێگەهەكێ بهێزێ ئابووری و دبلۆماسی هەیە و فاكتەرێ ئارامی و سەقامگیریا ئیراقێ و دەڤەرێ یە، ژلایەكێ دیتر خوەدی سەركردایەتیەكا لێزان و حوكمەتەكا خوەڕاگرە، دشێن ب ئاشتیانە بەرسینگێ هەمی پیلان بگرن و قەیرانا دەرباز بكەن، ڤێجا پێدڤی یە دەستهەڵات نهۆ ژبووی ئارامی و سەقامگیریا ئیراقێ یا سیاسی و ئابووری و بهێزبوونا سیستەمێ وێ یێ دیموكراسی و فیدرال وازێ ل ماندەلكرنا مافێن خەلكێ كوردستانێ و دژایەتیا قەوارێ هەرێما كوردستانێ بئینن و بۆ هەر پرس و ناكۆكیەكێ بلا دەستووری دادوەر بیت، چونكێ زیانێن وێ دێ ب ئیراقێ كەڤنەڤە و گران دێ لسەر راوەستیت. پێشڤەچوونا ئیراقێ د هەڤبەشی و پێكڤە ژیانا پێكهاتێن وێ دایە نەك ماندەلكرنێ، ماندەلكرنا من وەكی كورد، بریارا ماندەلكرنا فیدرالی و دیموكراسیەتێ و ئیراقەكا ئێكگرتی و پێشكەفتی و ئارام و سەقامگیرە، دەستێن وە دێ پێ هێنە سۆتن. گەلێ كورد ب هەوێن قڕكرنێن بهێزتر ژ ناڤ نەچوویە.
