پاشەرۆژەکا گەش چاڤەڕێی تورکیا یە
یاشار گولەر وەزیرێ بەرگریێ یێ تورکیا سەرەدانا باژێرێ جۆلەمێرگێ یێ باکورێ کوردستانێ کر و د داخویانیەکێ دا بۆ دەزگەهێن راگەهاندنا تورکیا دیار کر، چهل سالن ل تورکیا شەڕەک دژوار هەبوو و نها شەڕ ب دووماهیک هاتیە و قووناغەکا نوو دەستپێکریە، ئێدی ب هەموو رەنگەکێ کار ژ بۆ برایەتیا کوردان و تورکان دهێتە کرن و گۆت: (ئەم دێ ل گەل برایێن خوە یێن کورد پێکڤە وەلاتێ خوە بهێز کەین، دێ پێکڤە ب ئازادی ژین، تورکیا وەلاتێ کوردان، تورکان و عەرەبانە و ئەم نەچارین پێکڤە وەکو برا بژین).
وەزیرێ بەرگریێ یێ تورکیا ئەو یەک ژی دیار کر، قووناغا ئاشتیێ ب رەنگەکێ باش بەردەوام دکەت و چو ئاستەنگی ژی نینن، بێگومان د دەمەکێ نێزیک دا دێ گوهۆڕینێن گەلەک مەزن ل تورکیا روو دەن، دێ تورکیا بهێز کەڤیت و پاشەرۆژەکا گەش چاڤەرێی گەلێ تورکیا یە.
