بـریـنەكـا كـەڤـنار د بیردانـكا مێژوویـێ دا مای
دیار سلێمان
چەند سالە ئێكودو دناسین، هەڤكار و هەڤ تەمەن ب جیوازیەكا كێم لێ جیوازیەكا زێدە ژ سەربووری. ئەو ژ كەركووكێ یە، باژێرەكێ كو هێشتا برینەكا كەڤنارە د بیردانكا مێژوویێ دا مایی.
پتری بیست سالانە ل سڕ و سەرمایا سوێدێ دژیت، تاكو پار پەناهندەییا سیاسی یا ب مەرج كو نەزڤریتەڤە كوردستانێ یا ستاندی، پەناهندەیەك دویر ژ ئەردێ باب و كالان. سەرەرایی ڤێ چەندێ سر شۆر نەكر و ب ڤەشارتی خوە گەهاند بوو كەركووكێ داكو ب دیتنا پیرە دایك و بابێ خوە شاد بیت و شیای بوو بۆ چەندەكێ ژی بیت گرانیا سالێن دویركەفتنێ ژ وانا ل سەر ملێن خوە سڤك بكەت.
ڤان رۆژان دیتنا وی خوەلیا خەمێ ب خۆڤە گرتیە، تشتەك د هندرێ وی دا دكەلێت كو زمان ژ ئاینێ ل سەر زاری ناتەوانە.
من ژێ پرسی «ئایا هەمی تشت باش دبۆرێن؟» گۆتێ»بەلێ».بەلێ دێمێ وی راستیەكا دیتر دئانی زمان. ل سەر داخوازا من پەردە ژ سەر نەخوەشییا خوە راكر و گۆت» بێزارم و دلتەنگ».
من گۆتێ» هەرە گەریانەكێ بەلكو وەك دەرمانەكێ چارەساز بیت». گۆتی»دەركەفتن دەرمانێ برینا من چارەسەر ناكەت « و پاش تەحلییا ژانا خوە ئانی زمان و گۆت «ئەم بنەمالەكا مەزنین ل كەركووكێ، بەلێ مەزناهییا مە تەنێ دەرد و رەنج بوویە ژ مە، ئەڤە چەندین سالە وەك ئامیرەكێ پاشگوه ئێخستی د ناڤ لەپێن حزبێن كوردی دا دئێنە بكارئانین، ئامیرەكیێ تەنێ د هەلبژارتنان دا گرنگی پێ دهێتەدانێ، برایێن من ژێر هەر هەمی ژێر باردۆخێ ژیانێ دا دژین و هەرهەمی كرێچینە و دەست تەنگیێ و بێ خودانیێ دۆرپێچ كرینە و مە چ خێر ژ خوە نەدیتیە، تەنێ گونەها مە كورد بوونە، گونەهەكا حەتا ئەڤرۆ ژ خەنی زنجیرێ تشتەكێ دی نەبوویە بەهرا مە. چونكو مە نەڤیایە بەردەرگەهێ هێزێ چۆكا دانین.
ئەڤرۆ دیسا هەر ئەو حزب یێن هاتین ل دویڤ ئامیرەیێ خوەیێ پاشگوه ئێخستی! ئەز ژی دوێرم و تەنێ مە و دەستێ من ناگەهیتە چ تشتەكێ و برایێن من ژی دڤێن هەر خەلەتیا جاران بكەنەڤە.
ئاخڤتنێن وێ وەكو پێلەكا دەریایی ئەز دویربرم، گەنجێ كوردێ كەركووكی ئینایە بیرا من كو رۆژەكێ نامەیەك بۆ هونەرمەند شڤان پەروەری نڤێسابوو و باس ژ ئێش و ژانێن خوە دكر، ئەڤرۆ راستیا ئاخڤتنا وی وەك چەنگێ د گوهێن من دا دهێت و چیت.
بەلێ كوردبوون ب زەحمەتە، چونكو رامانا وێ ژیانە د ناڤبەرا پەناهەندەیی و وەلاتی دا، غەریبیا دەرڤە و یا ناڤخوە، ئەڤ هەردو وەك دو لێڤێن خەنجەرێنە كو بەردەوام دلێ مرۆڤی دبڕن و بریندار دكەن.
