ژبەر نەبوونا ئاڤێ و شیری من كوڕێ خۆ ژ دەست دا!
سامی بنیامێن رێكانی
ئەنفالا ڕەشا 1988ێ دەما رژێما بەعسا ژناڤچووی فەرمانا وێرانكرنا گوندێن كوردستانێ دەركری و كەفتیە د وارێ جێبەجێكرێ دا، نەخاسمە د قۆناغا هەشتێ و یا دوماهیێ ل دەڤەرا بەهدینان, دەست ب تۆپبارانكرنی و كیمیا بارانكرێ كر ل سنۆرێ پارێزگەها دهۆكێ هەتا سنوورێ توركیا بۆ خەلكێ دەڤەرێن ئازادكری مینا رۆژا قیامەتێ لێ هات و هەر ل وی یێ زارۆكێن خۆ ژ زۆلما بەعسیا قورتال دكەتن, بەر ب سنۆرێ توركیا دانە رێ و ماڵ و حالێن خۆ هێلان, ژبەر كو هەمی نەشییان خۆ قورتال بكەن ب هزاران كەفتنە دەستێن سەربازێن بەعسیا و بێ وژدانە سەرەدەری ل گەل زارۆك و پیر و ژن و زەلامان دكر و دەست ب ئەشكەنجادانا وان دكر هەتا گەهاندینە كەمپێن بەحركێ و جهێن دیتر. بێ خوارن و ڤەخوارن و نهانی و گەلەك دەردەسەری دیتن و زارۆكێن خۆ ژ برسا و نەساخیا ژ دەستدان. ئەڤە ئێك ژ وان چێرۆكانە كو بووینە قوربانی زۆلما رژێما بەعس.
مە كچێن خۆ ل بەر سەربارزان ڤەدشارتن!
رەحیما شوكر سالح مێزی، ژ دایكبوویا (1952)ێ یە، نەه كەس ژ كەس و كارێن وێ هاتینە ئەنفالكرن، ژ وان كوڕەك و هەڤژینێ وێ بوون، بەحس ل وان دەردەسەری و بویەرێن ب چاڤێن خۆ ل ئەنفالێ دا دیتین، وان هەمییان ڤەدگێریت و دبێژیتن: دەما مە زانی كو ئەنفالێ یا دەستپێكری ئەم ژی رابوین مە كنجێن خۆ (كەل و پەل) تێكرا كرن و مە دانە پشتا خۆ، هەر ژ گوندێ (مێز) هەتا ئەم گەهەشتینە گوندێ كریادێرێ، ئەم ب پێیان هاتین، مە خۆ ل جهەكی گیرۆنەكر دا كو بشێین خۆ نێزیكی سنوورێ توركیا بكەین، ژبەر كو مە زانی ئەگەر ئەم كەفتینە د دەستێ وان خوین مێژان دا، دێ بەلا ب سەرێ مە ئینن. دەمێ ئەم گەهشتینە كریادێرێ، مە هند دیت كو سەربازێن رژێمێ رەخ و دۆرێن مە گرتن و ئەم داینە بەرا خۆ و برینە گوندێ (خاڵكا)، گۆتە مە دێ هەوە ب رێكا هەلیكوپتەرێ بەینە خارێ. مە ژی گۆتێ ئەم حەز دكەین كو ب پێیان بچین، مەرەما مە ئەو بوو كو خۆ ژ دەستێن وان قۆرتال بكەین، لێ وان ب زۆری ئەم سیاری هەلكۆپتەرێ كرین و ئیناینە كەمپا سیریێ داناین. بێهنەكی ماینە ل وێرێ، پاشی ئەم ل زیلا سیاركرین و ئەم و زەلام ژێك جودا كرین، هەتا ئەم برینە دێرەلۆكێ كرینە د ئاڤاهییەكی ڤە و پشتی هینگی ئەم برینە كەلها نزاركێ ل دهۆكێ، ژن و زارۆك برنە قاتێ دووێ و زەلام ژی هێلانە قاتێ ئێكێ، هەر وێ گاڤێ دەست ب ئەشكەنجەدانا وان كر و مە گوه ل قاریێن وان دبوو دەمێ د ئەشكەنجەددان، و چو ژ مە نەدهات، بتنێ مە دكرە گری و هەوار. هەر جارجار ژی دا چەند سەرباز هێنە د ژۆرێن مەڤە، دابێژن كچ ل گەل هەوە هەنە مە ژی كچ دانە پشت خۆ ڤەدشارتن دا ئەو نەبینن، دوازدە رۆژان حالێ مە ئەو بوو مە چو خۆشی نەبوون ژبەر دەنگێ ئەشكەنجەدانا زەلامان و ژ برسا دا. نەساخی كەفتە د ناڤ مەدا، كچەك تووشی نەخۆشییەكی بوو ئەم هەمی ل هنداڤی سەری بووین و چو ژ مە نە دهات بۆ بكەین و وان ژی وەنەدكر ببەینە نۆژدارەكی كو چارەسەرییا وێ هاتبا كرن.
هەر د بەردەوامییا ئاخفتنێن خۆ دا خالەتا رەحیما چیرۆكا خۆ بەردەوام دكەت و دبێژیت: دەمێ ڕۆژا دویماهیێ ژ كەلها نزاركێ هەمی زەلام كرنە د زیلەكی دا و هاڤێتنە سەر پشتا ئێك و بێ وژدانی و مینا جەللادا سەرەدەری د گەل دا كر ئەم ژی چووین دا دویڤرا چین، ئەوان وەكی ئەژدەهاییان بەردا دویڤ مەڤە و ئەم كرینە د ژۆرێن مە ڤە، خۆ ئەم نەشییاین خاترا خۆ ژ كەس و كارێن خۆ بخوازین. ل پێش چاڤێن من كوڕێ من و هەڤژینێ من كرێتترین سەرەدەری دگەل دا كر و هەر ژ وێ ڕۆژێ ژ بەر دلێ مە برن و ب ساخی بنئاخ كرن!.
