ئەنفالا بەهدینان جینۆسایدبوو ل دژی گەلێ كوردستانێ
ئارام حاجی
ئەنفال برینەكا نەدەركریە ل دەف هەر تاكەكێ كوردستانێ و رۆژانە خوین ژ وێ برینێ دباریت، رژێما بەعسا توخم پەرێس گەلەك رێكگرتنە بەر بۆ ئەشكەنجەدان و گرتن و سۆتن و تالانكرن و گوند وێرانكرنا كوردستانێ و دڤیا بزاڤا رزگاریخوازا كوردستانێ هەتا هەتایێ بحەلینن و نەلهێن ساخ، ئەنفال ئەو تاوانا مرۆڤایەتی ژێ تۆرە و بەری كو مەزنترین جینۆساید بوو ل دژی گەلێ كوردستانێ حزبا بەعس ئەنجام داین، ب هزاران خەلكێ مە ئاوارە و پەنابەر و دەربەدەر بوون، گەلەك كارێن ل دژی مرۆڤی و مرۆڤایەتیێ هەنبەر دا هاتینەكرن.
شۆرەشا گولانێ و بزاڤا رزگاریخوازیا گەلێ كوردستانێ پشتی سەركەفتن و دەستكەفتێن مێژوویی ل سەر دوژمنی تۆماركرین و پێشمەرگێ كوردستانێ ل مەیدانێ چوول نەكرن و نەچەمیاین و شیا دەربێن كوژەك ب دوژمنی بگەهینیت، دوژمن نەشیا سەركەفتنان ل سەر ئاخ و ئیرادە و هێزا پێشمەرگەیێ كوردستانێ ل سەنگەران و تووشی شكەستێن مەزن بوون، لەوما رژێما فاشستا سەدامی دەست ب هەوا نەهێلانا گەلێ كوردستانێ كر هەتا جهێ داربەرویان؛ قەسپان لێ بچینن و كانی و رووبار و باغێن مە بكەنە بیابان و تۆڤێ كوردان نەهێلن، عەرەبان بكەن خۆدانێن كوردستانێ، ئەوا وان ڤیای دەستپێكر و هەمی رێكێن تاوانێ بكارئینان، ئەنفال هەوەكا جینۆسایدێ بوو ل سەر بنگەهێ شۆرەشێ و پارتی دیموكراتی كوردستان، رژێمێ پەنا برە بەر بكارئینانا هۆڤانەترین هەوا قڕكرنا مرۆڤایەتیێ ب ناڤێ (ئەنفالا) ل دژی گەلێ كورد، د قۆناغا هەشتێ دا د ناڤبەرا (٢٥/٨ هەتا ٦/٩/١٩٨٨ ) ب درندەترین شێوە هێرش كرە سەر دەڤەرا بەهدینان و چەكێ كیمیاوی یێ قەدەغەكریێ نیڤدەولەتی بكارئینا و د بەرنامەیەكێ رێكخستی دا ب سەدان گوند وێرانكرن و نێزیكی (٢٣٠٠٠) وەلاتی كو پڕانییا وان سڤیل بوون شەهید و بێ سەروشوینكرن، ژبلی گرتن و ئاكنجیكرنێ ب دەهان هزارا ل كۆمەڵگەهێن زۆرە ملی، ل وی دەمی دەڤەرا بەهدینان بنگەهەكێ سەرەكیێ بزاڤا رزگاریخوازیا كوردستانی و شۆڕەشا گولانا پێشكەفتنخواز بوو ب سەرپەرشتیا پارتی دیموكراتی كوردستان و سەرۆك مەسعوود بارزانی كو شیا بوون چەندین دەڤەران رزگار بكەن و رێكخستنێن پارتایەتی ل پڕانیا گوندان كاڕا بكەن و چالاكیێن مەزن و نموونەیی ئەنجامبدەن و هەستا نەتەوی و نشتیمانی د ناڤ هەمی تەخێن جڤاكی دا بلند بكەن و رۆژانە كۆم ب كۆم لاوێن دەڤەرێ پەیوەندی ب رێزێن پێشمەرگەهێن كوردستانێ دكرن، ئیرادەیا وان یا نشتیمانی تەسلیمی ئیرادەیا رژێما بكەرێن ئەنفالێ نەكرن و هەر ساخ مان و ئەنفالچی روخیان.
راستە هەوا قڕكرنا گەلێ كوردستانێ زیانێن گیانی و ماددی و جڤاكی و دەرۆنی هەبوون، لێ ب خۆڕاگری و تەسلیم نەبوونا پێشمەرگەهێن كوردستانێ ب سەرپەرشتیا سەرۆك مەسعوود بارزانی ل سێگۆشەیا سنووریا ( ئیراق، توركیا، ئیران) ل دەڤەرا خواكۆڕك شیان داستانەكا مەزن تۆمار بكەن و دربێن مەزن ل دوژمنی بدەن و رێكێ ل سەرگرتنا وێ پیلانا هەرێمی بگرن، وێ سەركەفتنا پێشمەرگەهی وڕە و هەستا نەتەویا پێشمەرگەهی و خەلكێ كوردستانێ بلندكر و دەڤەرا بەهدینان ب بنگەهێ شۆڕەشێ و بزاڤا رزگاریخوازیا كوردستانی و پارتی دیموكراتی كوردستان و رێبازا بارزانی هەتا نوكه بهێلیت، ل ڤێ بیرهاتن و بیرئینانێ ب هزاران سلاڤان بۆ گیانێ شەهیدێن ئەنفالا بەهدینان و هەمی قوربانی و زیان ڤێكەفتیان فرێدكەین، سلاڤ ل خۆڕاگریا خەلكێ بەهدینان یێ شۆڕەشگێر و نشتیمان پەڕوەر و ستوونا ب هێزا شۆڕەشێن كوردستانی و پارتی و رێبازا بارزانی، ئەنفال خلاس نابن لێ كورد نامرن هەر شكەستن و شەرمزاری بۆ دوژمن و بكەرێن ئەنفالان بن.
