هـەڤـالێ راسـت شـەمـالـكە د شـەڤ تاریان دا
مسلح یاسین
د ژیانێ دا رۆژانە و د دەمێن جودا دا د ناڤ كۆلان و بازار و جهێن كاری گەلەك مرۆڤان دبینین و ناسیاریێ دگەل دا پەیدا دكەین، پێكڤە دئاخڤین دكەنین دپەیڤین وەك بەرچاڤ مرۆڤێن باشن دەما دپەیڤین بۆ گوهێن مە موزیكە تو دێ وەسا تێگەهی دێ بێژی هێشتا مرۆڤێن باش دزۆرن و مرۆڤایەتی زیندی یە، لێ رۆژ دێ هێن و دێ رۆژ چن دێ دیاربیت كو ئەو مرۆڤێن تە دنیاسین ب تنێ گۆتن و پێكەنین ودەم بۆراندن بوو نەزێدەتر.
هەڤالێ راست و دورست نەوەك وانە یێن تو رۆژانە ل جهێن كاری یان د ناڤ بارزاری یان جهێن گشتی دا دبینی، بەلكو دچەندین هەلوەست و رۆژێن بەرتەنگ دەما دكەڤیە رەوشەك ئالۆز دا دێ ژنویی هەڤالێ راست دیار بیت.
هەڤالێ راست ئەوە یێ ل خۆشی و نەخۆشیان دگەل تە دا بیت.
د جیهانا ئەڤرۆ دا زۆر مرۆڤ هەنە ل دەستپێكێ دەما ناسدكەی وەك كەسەك باش دهێتە دیتن، لێ وەخت دهێن و دبۆرن د تاقیكرن و كاركرنا دا د گەل رابوون و روینشتنان دا دخوارن و ڤەخوارنان دا، رویێ وی یێ راستەقینە دێ دیاربیت و دەما تو پێدڤی دبی دێ رۆژ بۆ تە دەنە دیاركرن كا چ رەنگە مرۆڤە.
هەڤالێ باش ئەوە دخۆشی و نەخۆشیان دا دكەڤتن و سەركەڤتنان دا و بێی بەرژوەندی وەك چیایەكێ دێ دگەل تە دا مینیت.
ئەڤجا ئەگەر تە هەڤالەكێ باش هەبیت د ژیانێ دا بەهایێ وی زۆرە ب هەمی سامانێ دونیایێ ناهێتە گوهۆرین و هشیاربە ژ دەستنەدە، چونكی ب ساناهی تە ئەڤ هەڤالە پەیدا نەكریە، د رۆژانێن ژیانێ دا د دەمێن جودا دا دێ هەڤالێن جۆرا و جۆر بینی چ د ناڤ زانكۆ و پەیمانگەهان چ ژی د گەشت و گەریانان دا چ ژی د جڤاتان دا و ل جهێن كاری، لێ كێمن وەك تبلێن دەستان تو بكاری هەمی دلێ خۆ ژێرا ڤەكەی و نهینێن خۆ بۆ بێژی و دلێ خۆ ئارام بكەی.
هەڤالێ باش برایە نەبتنێ ب پێنگاڤا ئێكێ دێ دگەل تە دا بیت بەلكی هەتا دوماهیك پێنگاڤ د ژیانێ دا دێ دگەل تەدا بەردەوام بیت.
ل دوماهیی خۆ ماندی نەكە ب چ هەڤالان ڤە، تنێ پشتبەستنێ ل سەر خۆ بكە و تە باوەری ب خۆ هەبیت، چونكی ئەوێ هەڤال بیت دێ مینیت هەڤال ئەوێ بڤێت دویر بكەڤیت دێ گەلەك بەهانەیان پەیداكەت.
هەڤال ئەو كەسە كو هەموو دەما د گەل تەدا بیت بێ یی رەنگ و زمانێ خۆ پەیوەندیێن خۆ بگوهۆڕیت، دێ نهێنین تە ژی وەك بویبلكا چاڤێن خۆ د سینگێ خۆ دا پارێزیت، هەڤالێ راست نەبتنێ دێ خۆشیان دا دگەل تەبیت، بەلكو د دژوارترین بێ ئومێدی دا دێ دگەل تەدا مینیت و دوور ناكەڤیت.
بەرانبەر هەر كاودانەكێ د رەوشەك ئالۆز و گران دا، دێ پشتەڤانیا تە كەت، د بەرتەنگاڤیان دا دێ مل ب ملێ تەڤە بیت.
ل دوماهیی هەڤالێ راست و دورست و دلسۆز ب خورتی ناهێنە د ژیانا تە دا، لەو دێ بێژم ئەگەر تە هەڤالەكێ راست و دروست و خودان رەوشت هەیە بزانە ئەو خەزینەیا ژیانا تەیە، دڤێت بپارێزی و بەهایێ وی باش بزانی.
