دا فێرببین!!
سـەلام بـالایـی
ڤێ جارێ دێ بەحسا گۆرەپانێن راوەستیانا ترمبێلان كەین د ناڤا باژێرێ دهۆكێ دا.
دونیا یا بوویە گوندەكێ بچویك ب هەبوونا ڤێ تەكنولۆژیا سەردەم و ب لەز. ئەگەر رایەدار و بەرپرسێن رێڤەبەریێن مە، یان وەزیر و شارەدارێن مە نەچبن دەرڤەی وەلات. بلا كلیكەكێ ل سەر مێزا خۆ لێبدەن. دێ دیزاین و پێزانینێن وان دڤێن هێنە بەر چاڤێن وان، یان بلا خۆ شەقی بكەن پرسیارەكێ ژ مامێ (ژیریا دەستكرد) بكەن دێ هەمی بەرسڤا دەتە وان.
دا ژبابەتی دوورنەكەڤین دەما شارەداری یان هەر رێڤەبەریەكا پەیوەندیدار گۆڕەپانەكا راوەستیانا ترومبێلان ددەتەڤ كەسەكی یان بەلێندەرەكی هندەك مەرجان بۆ دادنیت، یان حوكمەت بوهایێن راوەستیانێ ل دویڤ دەمێن دیاركری بۆ خۆیا دكەت. لێ مخابن پڕانیا گۆرەپانێن ترومبێلان بێی مەرجن. هندەك ژ وان ئاخن و تێكدا تەسەنە، وە یا نڤێسای (ئەم بەرپرس نینین بۆ هەر تشتەكێ د ترومبێلێ دا بەرزە دبیت). گەلەك جاران ژی ترمبێلا هەڤوەلاتیان دهێت لێدان. خۆدانێ گۆرەپانێ دبێژیت مە شۆلەپێ نینە.
باشە هەكە گۆڕەپان تێكدا تەسە بیت، هەكە تشتەك بەرزەبوو تو نە بەرپرسی، هەكە هات لێدان و دەعماندن تە شۆلەپێ نەبیت. ئەو چ پارەنە تو ژ خەلكی وەردگری؟!
یا دروست و چارە بۆ ڤێ دیاردەیا نەشرین ل گۆڕەپانێن راوەستیانا ترومبێلان دڤێت شارەدار مەرجان بۆ هەر گۆڕەپانەكێ دانیت. وەك قیڕكرن، یان چیمەنتۆ كرن، یان كا گۆڕەپان چەند ترومبێلان ڕادگریت زێدەتر نەهێنە حەواندن. بلا سۆیچێن چ تڕومبێلان ڤ خودانێ گەراجێ نەبن. هینگێ ئەو نەبەرپرسە ژ بەرزەبوون و دەعماندنا ترومبێلان، لێ هەكە سویچ ڤ وان بن ئەو بەرپرسن ژ هەر ڕوودانەكێ. دڤێت ئەڤە هەمی مەرج بن بۆ هەر كەسێ گۆڕەپانەكێ كرێ دكەت. یا دی هەر گرێدایی ڤی بابەتی ئەگەر تو بچی گەراجێ جهێ گەشتیاری ل سەرێ چیایێ (زاوا) كرییا راوەستانا ترومبێلێ ب (١٥) هزار دینارانە، ئەڤە بوهایەك زۆرە دڤێت دویڤچوون بۆ ڤێ ئێكێ ژی هەبیت، لێ مخابن هەتاكو نوكە مە نەدیتیە چ مەرج ژ ڤان ل سەر خۆدانێن گۆڕەپانان یان بلا ب كولانكی بیت گەراجان هاتبان سەپاندن. یان دویڤچوونەك بۆ بوهایێن گەراجان هەبیت، ئەگەر مە ئاڤاكرنا باژاڕان دڤێت فەرە سیستەمەك بۆ هەر كارەكی، یان هەر رێڤەبەریەكێ هەبیت دا وەلاتەك جوان پڕی ئاڤەدانی و شارستانی ئاڤا بكەی.
