گرنگ نینە كی بەربژارە گرنگ ئەوە دێ كێ هەلبژێری
نۆرا جەعفەر شیمۆ
پەڕلەمان سازیەكا قانووندنانێ یە كو ئیرادەیا گەل نیشا ددەت، ژ كۆمەكا ئەندامان پێكدهێت كو ژ لایێ گەل ڤە ب ڕێكا هەلبژارتنان دهێنە دەستنیشانكرن، كارێ وێ دروستكرنا قانوونان و سەرپەرشتیكرنا حوكمەتێ و پەسەندكرنا بودجەی و گفتوگۆ ل سەر بڕێڤەبرنا دەولەتێ.
پەڕلەمانێ ئیراقێ ب شێوەیەكێ گشتی ل سالا ٢٠٠٣ پشتی نەمانا سیستەمێ دكتاتۆری یێ (سەدام حسێن) كو سیستەمەكێ نوی یێ حوكمڕانیێ ل ئیراقێ هاتەدانان كو ب سیستەمێ (فیدڕالی، دیموكڕاتی، پەڕلەمانی) دهێتە بناڤكرن ل دویڤ دەستوورێ نۆێ یێ ئیراقێ ل سالا ٢٠٠٥ پەیڕەو بوویە.
پەڕلەمانێ ئیراقێ هەتا نوكە د پێنچ خولێن قانوونی دا دەربازبوویە، كو خولا ئێكێ ( ٢٠٠٦ – ٢٠١٠) خولا دویێ (٢٠١٠ – ٢٠١٤) خولا سێیێ (٢٠١٤ – ٢٠١٨) خولا چارێ ( ٢٠١٨ – ٢٠٢١) خولا پێنجێ (٢٠٢١ – هەتا نها)، د پەڕلەمانێ ئیراقێ دا هەر چار سالان جارەكێ هەلبژارتن دهێنە ئەنجامدان.
ل دویڤ دەستوورێ هەردەم یێ دەولەتا ئیراقێ كو ل سالا ٢٠٠٥ هاتیە دانان د ماددەیێ (١١٧) دەقێ وێ ئاماژە ب هندێ ددەت كو (ئەڤ دەستوورە دانپێدانێ ب هەرێما كوردستانێ دكەتن ب دەستهەلاتێن وێ وەك هەرێمەكا فیدرالی)، ل ڤێرە دیار دبیت كو هەرێما كوردستانێ مافێ ڕەوا یێ هەی كو د بڕێڤەبرنا پەڕلەمانێ ئیراقێ دا پشكدار ببیت ژبۆ پاراستنا مافێ گەلێ كورد.
پشكا هەرێما كوردستانێ ل پەڕلەمانێ ئیراقێ ب شێوەیەكێ قانوونی هاتیە دیاركرن، هەرێما كوردستانێ خۆدان ٥٨ كورسیانە ل ژێر ٣٢٩ كورسیێن گشتی یێن پەڕلەمانی.
هەرێما كوردستانێ خۆدان سیستەمەكێ دیموكراتییە، ئەڤە ژی وێ چەندێ ددەتە دیار كرن كو هەموو تەخ و چینان مافێ بەربژاركرنێ هەیە ژبۆ وێ چەندێ خۆ كاندید بكەت داكو بچیتە د ناڤا پەڕلەمانی دا.
د ڤێرە دا نەیا گرنگە كی بەربژارە یا گرنگ ئەوە تو دێ كێ هەلبژێری!.
ژبەر كو هیچ بەربژارەك بێی ڕازەمەندی و دەنگێن گەلی ماف نینە بچیتە د ناڤا پەڕلەمانی دا، ئەو كەسێن دهێنە هەلبژارتن نوونەرێن گەلن و كارێ وان پاراستنا مافێن گەلێ كوردە د پەڕلەمانی دا، هەر ژ بەر ڤێ چەندێ داكو مافێن گەلێ كورد نەهێنە پێشێلكرن پێدڤیە دەنگدەر وان كەسان دەستنیشان بكەت یان هەلبژێرن یێن كو شیان هەین مافێ گەلێ كورد بپارێزیت ل ناڤا پەڕلەمانێ ئیراقێ دا.
د نوكە دا كێم دەم مایە ژبۆ هەلبژارتنێن خولا شەش یا پەڕلەمانێ ئیراقێ لەوما یا گرنگە ژبۆ هەلبژارتنێن خولا شەشێ یا پەڕلەمانێ ئیراقێ دەنگدەر كەسێن دانا و زانا دەستنیشان بكەن یان هەلبژێرن داكو پاراستنێ ژ مافێن گەلێ كورد بكەن و د هەمان دەم دا پێدڤیە خۆ ژ لایەنێ عەشیرەت دویربێخن گەری و ڕەشوە و خزم و هەڤال و چەندین لایەنێن دی ژبۆ هەلبژارتنا ئەندامان داكو ئازادیا تاكی بهێتە پاراستن و دەنگێ وی نەبیتە قوڕبانیێ هیچ لایەنەكی.
