ئەمریکا ژ بەر ئسرائیلێ سیاسەتا خوە ل سووریێ گوهۆڕی
ب، سه‌رجان مەحمود:
بسپۆرەکێ کاروبارێن سیاسی دیار دکەت، ئێدی ل سووریێ نە ئەمریکا و نە ژی تورکیا نەشێن ب تنێ بریارێن گرنگ بدەن، بەلکو ئسرائیل رۆلەکێ سەرەکی ل سووریێ دگێریت و ژ بەر ئسرائیلێ ژی ڤێ دووماهیێ ئەمریکا سیاسەتا خوە ل سووریێ گوهۆڕی.
فەهیم تاشتەکین بسپۆرێ کاروبارێن سیاسی دیار کر، نها پەیوەندیێن تورکیا و ئسرائیلێ گەلەک ئالۆزن، ئسرائیلێ ل سووریێ ئێرشی چەندین جهان کر و هندەک سەرباز و ئەفسەرێن تورکیا ژی هاتنە کوشتن، لێ تورکیا هەتا نها ئەو یەک ب فەرمی ئاشکرا نەکریە، چونکی تورکیا نەڤێت هەموو پیلانێن وێ ل سووریێ ئاشکرا بن، لێ داخویانیا بەری چەند رۆژان یا سەرۆک وەزیرێن ئسرائیلێ کو دیار کر ئەو دزانن کا ل سووریێ شەڕێ کێ دکەن نیشا ددەت ئسرائیل ژ نێزیکڤە چاڤدێریا رەوشا سووریێ دکەت و ئسرائیل رێ نادەت چو گوهۆڕینەک ل سووریێ روو بدەت کو د بەرژەوەندیا وێ دا نەبیت، سیاسەتا نها یا ئسرائیلێ ل سووریێ ب تەمامی ل دژی بەرژەوەندیێن تورکیا یە.
ناڤهاتی ئەو یەک ژی دیار کر، هەتا بەری دەمەکێ سیاسەتا تورکیا و ئەمریکا ل دۆر سووریێ گەلەک نێزیکی ئێک بوون و ئەو یەک ژی ب دلێ تورکیا بوو، لێ پشتی روودانێن ل سوەیدا ئسرائیلێ دەستێوەردان کر و نها دورزیێن ل سورویێ داخوازا هەرێمەکێ بۆ خوە دکەن، کورد ژی دبێژن دڤێت سیستەمێ نوو یێ سووریێ نە ناڤەندی بیت و گۆت: (ئسرائیلێ پرانیا سیستەمێ بەرگریێ و هێزێن ئەسمانی و دەریایی یێن سووریێ ژناڤبر و نها سووریا د بیاڤێ سەربازی دا گەلەک لاوازە، ئەمریکا ژی ژ بەر ئسرائیلێ نەچار ما سیاسەتا خوە ل سووریێ بگوهۆڕیت و ئەو یەک ژی بوویە ئەگەرێ ناکۆکیێن گەلەک مەزن د ناڤبەرا تورکیا و ئسرائیلێ دا ل سووریێ).
بسپۆرێ کاروبارێن سووریێ ئەو یەک ژی دیار کر، ئێدی ئەمریکی باش دزانن بێی رازیبوونا کوردان و دورزیان و ئسرائیلێ چو دەستهەلاتەک ل سووریێ یا سەرکەفتی نابیت و ژ بەر ڤێ یەکێ ژی چەند رۆژن ئەمریکا سیاسەتا خوە ل هەمبەر کوردان ژی گوهۆڕینە و داخویانیێن بەری چەند رۆژان یێن تۆم باراکێ نوونەرێ ترامپی نیشا ددەت ئەمریکا پشتەڤانیێ ل مافێن کوردان ل سووریێ دکەت و ئەو یەک ژی بوویە جهێ دلگرانیا تورکیا.
فەهیم تاشتەکین د دووماهیا ئاخڤتنا خوە دا ئاماژە ب ڤێ یەکێ ژی کر، دڤێت تورکیا راستیێن هەی قەبوول بکەت، ئێدی کەس نەشێت ل سووریێ داخوازیێن کوردان رەت بکەت، دڤێت کورد د دەستهەلاتا نوو یا ل سووریێ دا پشکدار بن و بێی چارەسەرکرنا پرسا کوردی ل سووریێ دێ رەوشا وی وەلاتی هەردەم یا ئالۆز بیت، گرنگە تورکیا پێداچوونێ د سیاسەتا خوە ل سووریێ دا بکەت.
