گول ب گوللە
نێچیرڤان ناجی
دەریایا ژیانێ چەندین جاران مرۆڤی د ناڤ پێلێن خۆ دا بلند دكەت و پاش سەر ژێهەل ل دەریایێ دا نقووم دكەت، بابەلیسكێن دژوار یێن ژیانێ ئاراستەیێ ئارمانجێن مرۆڤی د گوهۆڕیت، هەر گوهۆڕینەك نوو بوو نەكە، نووبوون سەر و ژنوو ژیانێ ڤەدژینیتە ڤە، گرنگ د ناڤ ئەڤان شەقە شانێن گوهۆڕینا ئاراستەیێ ژیانێ دا، مرۆڤ مرۆڤ بمینیت و ئارمانجا بنەرەتی یا بوونا مرۆڤاتیێ نە گوهۆڕیت، نە دوورە ئەڤ گوهۆڕینە دەرگەهێ ئاڤاهیێن هەموو كەسان بشكێنیت و بێی دەستووردان ب ژۆر بكەڤیت و ل دووف بایێ قەدەرێ د ناڤ سندۆقێن ئارمانجێن مە یێن عومباركری دا بگەڕیت و ئەو پیلانان دۆر ژ دەستێ مرۆڤان بدەتە ڕێ.
ئا ئەڤە ئەو ژییانە یا مرۆڤ پێكۆلا خۆشكرنا وێ ل سەر حسابا تێكدان و شكاندنا دلێ لایەنەكێ دی ددەت، ئەڤجا چاوا دەرگەهێن قوفل دای یێن خۆشییا دلێ خۆ بۆ تاق بكەین؟ چاوا چنینا گولەكێ دل و ڤیانا كەسەكێ ب دەستخۆڤە بینین؟ چاوا دانانا گوللەیەكێ ئارماج و خۆشی و هیڤیا كەسەكی بن ئاخ بكەین؟ ما ئەڤە ئەو یەكسانیە یا بەحس ژێ دهێتە كرن؟
چاوا دلی ب ئارمانجكرنا بێ گونەهەكی پلا پەلەوانیێ ب رەخ ستوویێ خۆ یێ شكەستی ڤە خۆش بكەین؟ ئەی گول ما تە چەند باخچە نیگاركرن، چەند بێهنێن گەنی د ناڤ ڤێ جیهانا بێ مراد دا بێهنخوشكرن؟ تە چەند ڤیان نووكرن؟ بۆچی تە هێلا هەڤالجێمكا ناڤێ تە هەڤدژی تە بیت؟
ئەی گولا دوژمنا ژیانێ بۆچی تو نە دبوویە توڤەك و د ناڤ سینگێ ئارماجكری دا ببایە دارەكا جوان و پڕی بەرهەم و زارۆكێن ڤی وەلاتی بەرهەمێ تە ب دەستێن خۆ ل سەر جەرگسۆتیێن ڤی وەلاتی بەلاڤكربان؟ چاوا شیای ژ یاسایا مرۆڤبوونێ لابدەی؟ چەند دا یا جوان بیت تو ژی ببایە ڤیان و جوانیا هەڤالجێمكا خۆ تمامكربا و مرۆڤان هەست ب گوهۆڕینا ئاراستەیێ ئارمانجێ د ناڤ پێلێن تە یێن ساردا نەكربا.
