چاڤدێریا بازرگانیا دهۆكێ: چاڤدێـری ل سەر بازاڕی توند بوویە
دهۆك، لەزگین جۆقی:
پەیڤدارێ ڕێڤەبەرییا چاڤدێریا بازرگانی ل دهۆكێ راگەهاند، چاڤدێریا بازاڕی هاتیە توندكرن و دبێژیت: 140جهێن جودا یێن بازڕگانی ل دهۆكێ هاتینە سزادان و پتر ژ دو تەنێن مریشك و هێكان و كەرەستەیێن خوارنێ هاتینە ژناڤبرن.
شوكری شەفیق، پەیڤدارێ ڕێڤەبەرییا چاڤدێریا بازڕگانی ل دهۆكێ بۆ ئەڤرۆ گۆت: «لیژنێن چاڤدێریا بازرگانی ل دهۆكێ سەرەدانا كارگەهـ و عمبار و گوشتفرۆش و نانپێژی و سەمۆنخانە و خوارنگەهـ و كافتیریا و جهێن كەسكاتی و هەلاویستنا بهایان و داشكاندن و جوانكاریێن ئافرەتان و كوزماتیكا دكەت و نوكە چاڤدێری ل سەر بازاڕی گەلەك توند بوویە ژ پێخەمەت پاراستنا ساخلەمیا خەلكی».
گۆتژی: ئەڤ سالە هەتا نوكە 140 جهێن جودا یێن بازڕگانی ل دهۆكێ هاتینە سزادان و 2700 كیلۆگرامێن كەلوپەلێن دەم ب سەرڤەچوویی هاتینە گرتن و دو جهـ هاتینە دائێخستن و هۆشداری ب 320 جهێن جودا هاتیەدان».
