مووچەیێن زیندانیێن سیاسی بۆ سەر بەغدایێ ڤە دێ هێنە ڤەگوهاستن
هەولێر، قائید میرۆ:
بەرپرسەكێ وەزارەتا شەهیدان و ئەنفالكریان ئاشكرا كر، مووچەیێ زیندانیێن سیاسی بۆ سەر بەغدایێ دێ هێتە ڤەگوهاستن و دبێژیت: پشتی ڤەگوهاستنێ دێ مووچەیێ وانا ب شێوەیەكێ بەرچاڤ زێدەبیت.
ناڤسەر نووری عەبدال، بریكارێ وەزارەتا شەهید و ئەنفالكریان بۆ رۆژناما ئەڤرۆ دیاركر، بڕیارە مووچەیێ زیندانیێن سیاسی بهێتە راستڤەكرن و بكەڤیتە سەر حوكمەتا ئیراقێ و گۆت: «ئەم وەكی وەزارەتا شەهیدان دێ هەموو بزاڤەكێ ژ بۆی ڤەگوهاستنا مووچەیێ زیندانیێن سیاسی بۆ سەر بەغدایێ كەین، دیسا مە وەكو حكومەتا هەرێما كوردستانێ پێشنیارێن خۆ داینە حوكمەتا ئیراقا فیدرال».
ناڤسەر نووری گۆتژی: «ئەگەر حوكمەتا بەغدا چو ئاستەنگان چێنەكەت، ئەڤە دێ مووچەیێ زیندانیێن سیاسی ب شیوەیەكێ بەرچاڤ زێدەبیت، مووچەیێ هەر زیندانیەكی ژ 500 هزار دینارێن ئیراقی دێ هێتە زێدەكرن بۆ ئێك ملیۆن و 200 هزار دینارێن ئیراقی، هیڤدارین بەغدا چو ئاستەنگان چێنەكەت، هەتا زیندانیێن سیاسی یێن هەرێما كوردستانێ ژی ل گورەی قانوونێ ژ شایستەیێن خۆ یێن دارایی مفادار ببن».
