ب گوژمێ پتر ژ 25 ملیار دیناران پرتووك بۆ ناڤەندێن خواندنێ هاتینە دابینكرن
دهۆك، دلۆڤان ئاكرەیی:
رێڤەبەرێ پرۆگرامێن خواندنێ ل وەزارەتا پەروەردەیا حوكمەتا هەرێما كوردستانێ دیاركر، وەزارەتا پەروەردەیێ گوهۆڕینێن مەزن د چاپكرنا پرتووكێن خواندنێ دا دكەت و بۆ ئەڤ سالە پتر ژ 22 ملیۆن پرتووك ب باشترین كوالیتی هاتینە چاپكرن.
حەسەن سەرتیپ جاف، رێڤەبەرێ پرۆگرامێن خواندنێ ل وەزارەتا پەروەردەیێ بۆ رۆژنامەیا ئەڤرۆ گۆت: «بۆ ئەڤ سالا خواندنێ پتر ژ 22 ملیۆن پرتووكێن قوتابیان ب باشترین كوالیتی و ستانداردێن جیهانی و ب گوژمێ پتر ژ 25 ملیار دیناران ل چاپخانەیا مەساری یا ئیماراتی هاتینە چاپكرن، ئێك ژ تایبەتمەندیێن گرنگ یێن پرتووكێن نوو، زێدەكرنا باركۆدێ یە ل سەر لاپەران و دایك و باب و قوتابی دشێن ب ڕێكا مۆبایلێن خۆ ڤی باركۆدی سكان بكەن و ب شێوازێ دەنگ و ڤیدیۆ مفای ژ وانەیان یان چیرۆكان وەربگرن، ئەڤ تەكنۆلۆژیا نوو دێ ئاسانكاریەكا مەزن بۆ پرۆسەیا فێركرنێ كەت».
جاف گۆتژی: «نوكە وەزارەت كار ل سەر پڕۆژەیێ چاندكێ پرتووكان ژی دكەت، كو تێدا پرتووكێن پێدڤی بۆ قوتابیان دهێنە دابینكرن، دیسان كار ل سەر پڕۆژەیەكێ دی دهێتە كرن، كو پرتووك ب شێوەیەكێ بەردەوام و بێ بەرانبەر بۆ زارۆكێن ژییێ وان سێ و چار سالی بهێنەدان ، دا كو د ژییەكێ بچووك دا حەزا خواندنێ ل نك پەیدا ببیت».
