ئیران داخوازا سیستەمێ بەرگریێ ژ رۆسیا و چینێ دکەت
بەرپرسەکێ وەزارەتا دەرڤە یا ئیرانێ بۆ ئاژانسا ئیرنا یا وی وەلاتی دیار کریە، د چەند رۆژێن بۆری دا ب پشکداریا سەرۆک ئەرکانێ لەشکرێ ئیرانێ و فەرماندارێ گشتی یێ سوپایێ پاسداران و بەرپرسێن دی یێن هێزێن هەوالگری و ئێمناهیێ کۆمبوونەکا گرنگ هاتیە ساز کرن و د کۆمبوونێ دا هەموو بەرپرسان دیار کرینە دڤێت سیستەمێ بەرگریێ ژ رۆسیا یان ژی ژ چینێ بکڕین، چونکی ئسرائیل و ئەمریکا بەرهەڤیان بۆ ئێرشەکا نوو ل سەر ئیرانێ دکەن و هەکە سیستەمەکێ مودێرن یێ بەرگریێ نەبیت دێ زیانێن گەلەک مەزن گەهنە ئیرانێ.
هەمان بەرپرسی ئەو یەک ژی دیار کریە، ئیرانێ ب فەرمی داخوازا سیستەمێ بەرگریێ ژ رۆسیا و چینێ کریە، لێ هەتا نها وان هەر دو وەلاتان بەرسڤا ئیرانێ نەداینە و گرنگە د زووترین دەم دا ئیران ببیتە خوەدانا سیستەمێ بەرگریێ یێ مودێرن دا بشێت رێگریێ ل ئێرشێن ئسرائیلێ بکەت، هەکە ئەو یەک نەهێتە کرن دێ زیانێن گەلەک مەزن گەهنە ئیرانێ.
