لڤینێن بازرگانی هەڤبەركرن ل گەل سالا بۆری كێمبووینە
رێڤەبەرێ گشتیێ بازرگانی ل وەزارەتا بازڕگانیا حكومەتا هەرێمێ دیاركر، لڤینێن بازڕگانی ل هەرێما كوردستانێ ژ سالا بۆری كێمتربووینە و دبێژیت: بەردەوام بەغدا مەرجێن زێدەتر د دانیتە سەر بەرهەمێ هەرێما كوردستانێ و هەژمارەك زالگەهێن دی ژی داناینە.
نەوزاد شێخ كامل، رێڤەبەرێ گشتیێ بازڕگانی بۆ رۆژناما ئەڤرۆ خویاكر، لڤینێن بازڕگانی ب شێوەیەكێ ئاسایی نە، بەلێ هەكە ل گەل سالا بۆری بهێتە هەڤبەركرن، كێمتر لێ هاتینە، ب تایبەتی دانانا وان كۆدێن هاتینە دانان ل سەر ڤەگوهاستنا كەلوپەلان و دانانا هەژمارەكا زالگەهان د ناڤبەرا پارێزگەهێن هەرێم و ناڤەڕاست و باشوورێ ئیراقێ دا، كاریگەری ل سەر لڤینێن بازڕگانی كرینە، چونكی لڤینێن بازڕگانی سست كرینە و بەردەوام بەغدا بەهانەیان بۆ بازڕگانێن هەرێما كوردستانێ چێ دكەت.
نەوزاد شێخ كامل گۆت: «مەرجەكێ بەغدا بۆ بازڕگان و بەرهەمێ ناڤخۆ یێ هەرێما كوردستانێ ئەوە، كۆمپانی و كارگەهێن هەرێمێ ل بەغدا ژی بهێنە تۆماركرن، ئانكو هەموو كارگەهێن بەرهەم هەی ل بەغدا بهێنە تۆماركرن و ئەم ژی وەكو هەرێم دانپێدانێ ب كارگەهێن دەڤەرێن دی یێن ئیراقێ بكەین، ئەڤە ژی بوویە ئەگەر سستی بكەڤیتە لڤینێن بازڕگانی».
