ئەز نە بتنێ درێسم.. ئەز دەنگێ دیرۆكا ئەردەكی مە
نڤیسین: بەیارێ زاویتەیی
ئەز نە ب تنێ هندەك داڤێن دەزی یان هندەك رەنگم ل سەر پارچەیەكا پەرۆكی، بەلكو هەلگرێ بیردانكا مللەتەكی و دەنگێ دیرۆكا ئەردەكی مە، هەر داڤەكا دەزیێ من چیرۆكەكێ ڤەدگێریت و هەر رەنگەكێ من رامانەكا كوور ب درێژاهییا هزاران سالان هەلدگریت. دەمێ ئەز د كارگەها رستن و چنینێ دا ژ دایكبوویم، من نەدزانی دێ بەرپرسایەتییەكا مەزن هەلگرم – یان دێ بمە بالیۆزێ ئەردێ دهۆكا كەڤنار همبەری جیهانێ، لێ دەمێ ئەو هێمایێن پیرۆز ل سەر من هاتینە نەخشاندن ئەز د پەیاما خوە گەهشتم.
ل سەر سینگێ من دەرگەهێ ئامێدیكا سەربلندە ب هەموو رۆمەت و هەیبەتا خوە، ئەڤ دەرگەهە نە ب تنێ بەرن هاڤێتینە سەرئێك، بەلكو ئەڤ دەرگەهە دیدەڤانێ چەرخ و سەردەمێن دیرۆكێ یە و همبەری زەمانی خۆراگر بوویە هەروەكو خەلكێ ڤی ئەردی خۆراگر بوون، ئەو هێمایێ وان هێز و هەدار و ئیرادەیانە كو ناهێنە شكاندن. ڤی دەرگەهی خوە ل همبەری بیڤەلەرز و شەر و جەنگ و داگیركارییان راگرتیە، ئەڤ دەرگەهە بیرا مە دئینیت كو خۆراگری و خوەنەچەماندن گرنگترین ساخلەتێن ڤێ ئاخێ نە. ئەز ل سەرسینگێ خوە رۆژا لالشا نۆرانی یا پیرۆز ب تیرۆژكێن وێ یێن زێرین ڤە هەلدگرم، ئەو نە بتنێ هێمایەكێ ئۆلی یە، بەلكو فەلسەفا ژیانێ یە، ئەو رۆژا ب هزاران سالان رێكا ئۆلداران رۆهنكری، ئەو نیشانەكە كو هەردەم رۆناهی ل سەر تاریێ سەردكەڤیت و باوەری ژ هەموو تەنگاڤییان بهێزترە. دەمێ ئەز وێ رۆژێ ل سەر سینگێ خوە هەلدگرم، ئەز هەست ب بەرپرسایەتییێ دكەم كو پەیاما رۆناكبیری و زانینێ بگەهینمە جیهانێ. نڤیسینا میخەكی (مسماری) لسەر پەرۆكێ من، دیدەڤانێ كەڤنارییا ڤی ئەردی یە، دیدەڤانێ شارستانییەتێن مزوبۆتامییا یە كو ئێكەم پەیڤ د دیرۆكێ دا بۆ نڤیسینێ ل ڤێرێ ژ دایكبوویە، ب ڤان پەیڤان قانوونێن حەمۆرابی و داستانا گلگامش هاتین نڤیسین، ئەو زمانێ شارستانییەت و پێشكەفتنێ یە و بیرئانینەكە كو رهێن مە كوور د دیرۆكێ دا چووینە خار و ئەڤ ئاخە رۆناهییا هەموو شارستانییەتێ بوویە و هەر وەسا دێ مینیت.
دەمێ یاریكەر من دكەنە بەرخوە، ئەز هەست ب شانازیێ دكەم، هەست ب زاخەكا تایبەت دكەم د دەمارێن من دا دگەریت، ژبەركو ئەز نە ب تنێ نوونەرا تیمەكا وەرزشی مە، بەلكو ئەز ناسناما گەلەكێ فرەرەنگ و دەولەمەندم كو د ناڤ دا كورد، توركمان، كلد و ئاشووری و بوسرمان و كرستیان و ئێزدی و یێن دی ب پێكڤە ل ژێر ئێك ئالا دژین. دەمێ یاریكەر من دكەنە بەرخوە هەست دكەن كو نە ب تنێ بۆ ناڤێ یانێ كاردكەن، بەلكو دیرۆك و كولتورێ مللەتەكی رادكەن.
دەمێ دچمە ناڤا یاریگەهێ ئەز هەست ب هزاران چاڤان دكەم كو بەرێ وان ل منە، دخوازم بێژمە وان: ئەز خۆدیكا هەوەمە، ئەز دەنگێ هەوە یێ بێدەنگم یێ دیرۆكا هەوە بۆ جیهانێ ڤەدگێریت، هندی بكەنە گازی و پشتەڤانیێ بكەن هوین گیانەكێ نوو ددەنە من، ل وی دەمی دبێژمە شاشێن تێلەڤزیۆنان: هوین نە بتنێ وێنەیێ من ڤەدگوهێزن، بەلكو ل گەل من هوین چیرۆكا مللەتەكی و شارستانییەتەكێ ڤەدگوهێزن، لەورا هیڤیدكەم ڤێ چیرۆكێ ب ئەمانەت بگەهینن.
ئەز پەیامەكم بۆ جیهانێ كو دبێژیت: ڤێرێ دهۆكە، ئەردێ پێكڤەژیان و لێبوورینێ، ئەردێ دیرۆك و شارستانییەتێ، ئەردەكە فرەرەنگییا خوە پیرۆز دكەت و ب دیرۆكا خوە سەربلندە و بەرێ وی ل پاشەرۆژەكا گەشە.
