كێ كر و كێ خوار !
سالار محەمەد دۆسكی
دەمێ كەسەك خوە ئاڤا دكەت و هەموو ڤیان و حەزژێكرن و ژیانا خوە گۆری هزر و ڤیان و هونەرێ خوە دكەت، رەنگە گەلەك دەست كەفتان گۆری هونەری بكەت و د گەلەك قۆناغان دا دەرباز ببیت، ئاستەنگ و سەرنشیڤی و سەر ئەفرازی یا دبینیت، هەموو سەخمراتی، بێگومان ل چاخێ بۆری دەنگبێژ و سترانبێژ بتلێن دەستان بووینە و گەلەك ستران و هونەر دناف سینگێ خوە دا هەلگرتینە و پاراستین و دەڤەر بۆ دەڤەرێ ڤەگوهاستن و گەلەكا ژی بۆ پاریێ ژیانێ، جاران ب شەڤ هەتا سپێدێ ستران بێ راوستیان گۆتینە و گەلەكا دەرفەت بۆ چێبووینە ل ئێزگێ كوردی ل بەغدا یان هەر جهەكی ستران تۆماركرینە و هەتا ئەڤرۆ ژی ئەو تام و خۆشی تێدا ماینە و هاتینە پاراستن و گەلەك ژ ئەڤان سترانبێژان هەتا وەغەركرین ژی مرادا وان ئەو بوو تێر نانی بخۆن، ژیانا خوە هەموو ب هەژاری دەربازكر لێ بەرامبەر ڤیان و حەزژێكرنا خەلكی بۆ خوە كێشا و هەتا ئەڤرۆ زارۆك و مالێن وا ب ناڤودەنگێ وا یێ دژین و خوە د دەنە نیاسین، لێ تشتێ من دڤێت ل ڤێرە ئاماژە پێ بكەم وەك ل دەسپێكێ ژی مە ئاماژەپێكری كو ئەڤان هونەرمەندان ژیانەكا سەخت و دژوار دا ب هونەرێ خوە مەزن بووینە و ناڤدار بووینە و ل گەل وەغەركرنا وان بووینە مال و مولكێ خەلكێ كوردستانێ، لێ گەلەك جاران خێزان و كەس و كارێن ئەڤان هونەرمەندان ئەو هێز و سەنگ نینە ئەڤی بارێ مەزنێ هونەری راكەن و ئەو خزمەت و ماندیبوونا باب یان باپیرێ وی راكرین ئەو دێ هەموویێ گەلەك بچووك كەن و هەر ئەو ناڤێ هاتیە ئاڤاكرن دێ بچووكەن، ئەڤجا ب گەلەك رێكا بۆ نموونە ناهێلن كەسەك سترانێن هونەرمەندی بێژیت و گەلەك جاران بەرامبەر هەر كارەكێ كەسەك بكەت دێ خێزان و كەس و كار بنەرێگر و ناهێلیت ئەو كار بهێتەكرن و دێ داخازا داهاتان بەرامبەر كەن، ل ڤێرە دبێژم هونەر گرێدایی روحێ یە و دچیتە دناخێ هەر مرۆڤەكی دا و ئەڤە مولكێ گشتی یە، ئەڤە نە عەردەكە یان رەزەكە ژ بابێ بوویە میرات، چەوا مرۆڤی ئالا وەلات هەنە و مولكێ خەلكی نە هوسا سترانبێژ ژی مێژو و پارچەیەكا ڤی وەلاتی نە، گرنگە هەموو هیڤی و ئومێد بۆ وێ رێبازێ بچن یا ل سەر هاتیە ئاڤاكرن ئەو ژی خزمەت و ڤیان و هونەری بهێنە پاراستن.
