كوردستانێ ژ وەلاتەكێ بكارهێنەر بەرەڤ وەلاتەكێ بەرهەمهێنەر گاڤ هاڤێتینە
دلۆڤان ئاكرەیی
سەرۆكێ گشتیێ ئێكەتییا هاوردە و هەناردەكارێن كوردستانێ دیار كر، پەیوەندیێن بازرگانی د بەردەوامن، وەلاتێن ئەرەبی هەتا بەرهەمێ چاندنێ یێ كوردستانێ هەبیت، بەرهەمێ وەلاتێن دی هاوردەی بازاڕێن خۆ ناكەن، ئۆفیسێن كۆمپانیێن ترۆمبێلان ل كوردستانێ د زێدەبوونێ دانە، ب تایبەتی وەلاتێ چینێ و ئەوروپا و ئەمریكا.
شێخ مستەفا شێخ عەبدولڕەحمان، سەرۆكێ گشتیێ ئێكەتییا هەناردە و هاوردەكارێن كوردستانێ بۆ رۆژنامەیا (ئەڤرۆ) ئاشكرا كر، پەیوەندیێن هاوەردكارێن هەرێمێ یێن بازرگانی ل گەل وەلاتێن جیران د بەردەوامن، ب تایبەت توركیا و ئیرانێ، گەلەك جۆرێن كەل و پەلان ژێ دهێنە هاوردەكرن، ب تایبەتی ژی یێن پیشەسازی و یێن خوارنێ.
مستەفا عەبدوللا گۆت ژی: ل گەل وەلاتێ چینێ پەیوەندیێن بازرگانی بەرەڤ پێشڤە چووینە، هەمی جۆرێن كەل و پەلان ژ وی وەلاتی دهێنە هاوردەكرن، نوكە (٩) براندێن ترۆمبێلان ئۆفیسێن وان ل ئیراقێ و كوردستانێ هەنە، هەمی جۆرێن ترۆمبێلان دهێنە هاوردەكرن، هەتا پارچەیێن یەدەك ژی بۆ دهێنە هاوردەكرن دا كو بۆ ترۆمبێلێن خۆ بازاری پەیدا بكەن، ژ وەلاتێن ئەمریكا و ئەوروپا ژی ترۆمبێلێن ژێ جۆرێن جودا ب بەردەوامی دهێنە هاوردەكرن.
د بابەتێ هەناردەیا بەرهەمێن كوردستانێ بۆ وەلاتاندا گۆت: ماوەیێ چەند سالانە د بیاڤێ چاندنێ دا هاتیە شیان كۆ پشكەك ژ بەرهەمێن چاندنێ بهێتە هەناردەكرن بۆ دەرڤەی وەلاتی، كابینەیا نەهێ یا حكومەتا هەرێما كوردستانێ دەست پێكریە، جهێ دلخۆشیێ یە حكومەت گرنگیەكا زێدەتر پێ بدەت و سیستەمەكێ باش بهێتە دانان دا كو بەرهەم ب زووترین دەم بهێنە هنارتن بۆ بازاڕێن دەرڤە، پشكەك ژ كارگەهان ژی پشكەكا بەرهەمێن خۆ د هنێرنە دەرڤەی وەلاتی، لەورا بۆ زێدەكرنا بەرهەمی پێتڤی ب دامەزراندنا كارگەهێن زێدەتر هەیە.
هەر ئێك ژ بەرهەمێ هناران بۆ بەریتانیا و پەتات بۆ وەلاتێن سعودییە و ئیمارات و قەتەر هاتینە هنارتن، سێڤ و چەند جۆرێن دی یێن تری بۆ وەلاتێن ئەوروپی و ئەرەبی هاتینە هنارتن، ل بازاڕان داخوازیەكا زۆر ل سەر بەرهەمێ پارێزگەهێن دهۆك و هەولێر و سلێمانییێ هەیە و وەلاتێن ئەرەبی ژی هەتا كو بەرهەمێ باخداری و چاندنا كوردستانێ هەبیت وەربگرن، بەرهەمێ وەلاتێن دی وەرناگرن.
هەروەسا دبێژیت: بەرهەمئینانا چیمەنتۆ و شیشەی، ١٠٠% پشكداریا ناڤخۆیا مە هەیە و ئەم هەناردەی بازاڕێن پارێزگەهێن ئیراقێ ژی دكەین، بەرهەمێ شیرەمەنی ژی داخوازیا ٥٠% یا بازاڕێن كوردستانێ دابین دكەت و هەناردەیا بازاڕێ ئیراقێ ژی دهێتە كرن، كوردستانێ ژ وەلاتەكێ بكارهێنەر پتر بەرەڤ وەلاتەكێ بەرهەمهینەر گاڤ هاڤێتیە.
