دڤێت شام و هەسەدە پرسێن هەیی چارەسەر بکەن
پەیڤدارێ سکرتێرێ گشتی یێ نەتەوەیێن ئێکگرتی دیار دکەت دڤێت شام و هەسەدە ب رێیا دانوستاندنان پرسێن هەی د ناڤبەرا خوە دا چارەسەر بکەن و وەکو نەتەوەیێن ئێکگرتی ئەو پشتەڤانیێ ل چارەسەریەکا ئاشتیانە بۆ پرسێن نها ل سووریێ دکەن.
ستیفان دوجاریک پەیڤدارێ سکرتێرێ گشتی یێ نەتەوەیێن ئێکگرتی دیار کر، هەر ئالۆزیەکا نوو ل سووریێ روو بدەت دێ کاریگەریا خوە یا گەلەک خراب ل سەر ژیانا وەلاتیێن سووریێ هەبیت و ژ بەر ڤێ یەکێ ژی گرنگە هەموو پرسێن ل سووریێ دوور ژ شەڕی بهێنە چارەسەرکرن و وەکو نەتەوەیێن ئێکگرتی ئەو داخواز ژ شامێ و هەسەدێ دکەن دەست ب گەرەکا نوو یا دانوستاندنان بکەن و پرسێن هەی چارەسەر بکەن و گۆت: (ب توندوتیژی و شەڕی چو پرسەک ناهێتە چارەسەرکرن، نها سووریێ د رەوشەکا هەستیار دایە و مەترسیا تیرۆرێ و توندوتیژیێ گەلەک زێدە یە، گرنگە هەسەدە و شام هەست ب بەرپرسیاریا خوە ل هەمبەر هەموو خەلکێن سووریێ بکەن، ژ بەر ڤێ یەکێ ژی ئەم وەکو نەتەوەیێن ئێکگرتی داخواز ژ هەر دو ئالیان دکەین هەموو پرسێن هەی د ناڤبەرا خوە دا چارەسەر بکەن و رێ نەدەن شەڕەک نوو ل سووریێ روو بدەت).
ناڤهاتی ئەو یەک ژی دیار کر، دڤێت شام رێ نەدەت گرۆپێن چەکدار جارەکا دی ئیرشی دورزیان و عەلەویان بکەن، وەکو نەتەوەیێن ئێکگرتی وان بەری نها کوشتنا وەلاتیێن سڤیل یێن عەلەوی و دورزی شەرمزار کرینە و جارەکا دی داخواز ژ شامێ دکەن هەست ب بەرپرسیاریا خوە ل هەمبەر ژیانا هەموو وەلاتیێن سووریێ بکەت و دڤێت هەموو پێکهاتەیێن ل سووریێ کار بۆ ئارامیێ و پێکڤەژیانێ بکەن و گۆت: (مەترسیا شەڕەکێ نوو ل سووریێ هەیە، ژ بەر ڤێ یەکێ ژی ئەم داخواز دکەین رێگری ل شەڕەکێ نوو بهێتە کرن، چونکی ئەو یەک دێ کاریگەریا خوە یا خراب بۆ پاشەرۆژا سووریێ هەبیت، نها رەوشا ژیانا وەلاتیان ل پڕانیا دەڤەرێن سووریێ باش نینە و پێدڤیا وەلاتیان ب ئارامیێ و ژیانەکا خوەش هەیە، گرنگە هەم سووریا و هەم ژی هەسەدە کار بۆ ئارامیێ و پێکڤەژیانێ بکەن و رێ نەدەن چو شەڕێن نوو روو بدەن).
چاڤدێرێن سیاسی ژی دیار دکەن، ژ بەر ناکۆکیێن مەزن یێن د ناڤبەرا تورکیا و ئسرائیلێ دا سەبارەت ب پاشەرۆژا سووریێ، مەترسیا ئالۆزیێن نوو ل سووریێ هەیە، هەکە شەڕەک نوو ل سووریێ روو بدەت دێ گرۆپێن توندرەو دەست ب کوشتنا وەلاتیێن سڤیل کەن، ئەو یەک ژی جهێ دلگرانیێ یە، ژ بەر هندێ ژی نەتەوەیێن ئێکگرتی و ئەمریکا بزاڤا ڤێ یەکێ دکەن چو شەڕین نوو ل سووریێ روو نەدەن، لێ تورکیا و ئسرائیل ژ بۆ بەرژەوەندیێن خوە یێن ل سووریێ دشێن ببنە ئەگەرێ ئالۆزی و شەڕەکێ نوو.
