ڤەكرنا دەرگەهێن یاریگەها دهۆكێ بۆ مە جوانترین وێنەیێ براینیێ یە
د دیدارەكا تایبەت دا بۆ رۆژنامەیا ئەڤرۆ هاریكارێ ڕاهێنەرێ یانەیا نەورۆز یا فوتبۆلێ كەیفخوەشییا خوە دیار كر كو سەركەڤتنەكا گرنگ و یا ئێكێ د خولا ستێرێن ئیراقێ دا ئینا و سۆپاسییا پارێزگارێ دهۆكێ و یانەیا دهۆكێ كر كو دەرگەهێ یاریگەهێ بۆ تیما وان ڤە كری.
زێدەتر یاسین ئاراس گۆت: ژبەر چەند ئەگەرێن جودا مە نەشیا یارییا خوە ل یاریگەها خوە بكەین و هزاران جەماوەرێ مە بێ بەهر بوو ژ پشتەڤانیێ، لێ مە یاریگەها یانەیا دهۆك هەلبژارت و ب سۆپاسی ڤە پارێزگارێ دهۆكێ دەرگەهێن یاریگەهێ بوو مە ڤەكر ئەڤە ژی جوانترین وێنەیە بۆ براینییا وان، ل دهۆكێ مە یار كر لێ هەروەكو ل یاریگەها خوە ل باژێرێ سلێمانیێ بووین، بەرپرسێن پارێزگەهێ تایبەت د. عەلی تەتەر پارێزگارێ دهۆكێ و سەرۆكێ یانەیا دهۆك پشتەڤانییا مە كر، هاتنا جەماوەرێ مە ژ سلێمانیێ بۆ دهۆكێ نیشانەكا دی یا وەفاداریێ یە هاتییە دیتن.
ژلایێ خوەڤە كارگێرییا یانەیا نەورۆز سۆپاسنامەك ئاراستەیی یانەیا دهۆكێ كر و بڤی شێوەیی بەلاڤكر، پڕ ژ دل سۆپاسی و پێزانین خۆ ئاراستەیی هەلویستێ جوامێرانە و گیانێ وەرزشی بلند دهەژمێرین، ڤەكرنا دەرگەهێن یاریگەها خوە و ئامادەبوونا پشتەڤانێن مە و پشگێرییا هەوە وێنەیەكێ جوانێ برایەتی و ئێكڕێزی نیشان دا، ئەڤ سەركەڤتنە یا مە بتنێ نینە بەلكو بەرهەمێ وێ گیانێ وەرزشی یێ بلندە و پشكەكا وێ سەركەڤتنێ هوون ژی بوو، هوون نموونەیا مێڤانداریێ و وەرزش دوستیێ نە، سۆپاس پارێزگارێ دهۆكێ، سۆپاس یانەیا دهۆك.
