دەزگەهێ خێرخوازییێ بارزانی پڕۆژەیەكێ گرنگ بۆ زارۆیێن ئۆتیزمێ راگەهاند
زنار تۆڤی:
دەزگەهێ خێرخوازییێ بارزانی، ب هەماهەنگی ل گەل وەلاتێ ئیماراتێ و ب ئامادەبوونا هەژمارەكا بەرپرسێن حكومی ل هەرێمێ، د رێورەسمەكێ تایبەت دا دەرچوونا خولا پێنجێ یا قوتابیێن سەنتەرێ ئیماراتی بۆ ئۆتیزمێ ئەنجام دا، د رێورەسمان دا پڕۆژەكێ نوو بۆ بەرفرەهكرنا خزمەتگوزارییان بۆ زارۆیێن ئۆتیزمێ هاتە راگەهاندن، ب مەرەما گەهاندنا وان خزمەتگوزارییان بۆ هەموو باژێرێن كوردستانێ و ب رەنگەكێ زانستی و ستانداردێن جیهانی ئەو پڕۆژە دێ كاركەت.
مووسا ئەحمەد، سەرۆكێ دەزگەهێ خێرخوازییێ بارزانی راگەهاند: سەرۆك بارزانی ب گرنگیڤە بەرێخۆ ددەتە ڤی پڕۆژەی و زۆر یێ پێخۆشە، هەروەسا مەسرور بارزانی، سەرۆكێ بۆردێ دامەزرێنەرێ دەزگەهێ خێرخوازییێ بارزانی، ئەو ئاڤاهیێ ژ لایێ وەلاتێ ئیماراتێڤە هاتییە دروستكرن، پێشكێشی دەزگەهێ مە كر.
ناڤهاتی گۆت: «ئەڤ پڕۆژە ل سۆران دەستپێكریە و ل دەمەكێ نێزیك ل ئیدارا سەربخۆ یا زاخۆ ژی دێ دەستپێكەت، هەروەسا مە چەندین سەنتەرێن بچووكتر هەنە ل دەڤەرێن دیتر و هەموو بزاڤێن مە دێ ئەو بن، كو چو باژێرێن كوردستانێ بێبەهر نەبن ژ ڤی پڕۆژەیێ گرنگ».
هەروەسا د چار سالێن كاركرنێ دا، نێزیكی 110 كەسێن پرۆفیشنال د بیاڤێ راهێنانا زارۆیێن ئۆتیزمێ دا بۆ كوردستانێ هاتینە پێگەهاندن.
