ئەو كەسێن ئاهێن خوارنێ ژێ هاتینە بڕین ناهێنە قەرەبووكرن
رەمەزان زەكەریا:
رێڤەبەرێ گشتیێ بازرگانی ل هەرێما كوردستانێ ئاشكرا كر، ئەو كەسێن فۆرما ئەلكترۆنی یا ئاهێن خوارنێ تۆمار نەكری، بڕینا پشكا ئارێ وان دەستپێكریە و ڤێ مەهێ پشكا ئاهێن خوارنا وان ژی دێ هێتە بڕین.
نەوزاد شێخ كامل، رێڤەبەرێ گشتیێ بازرگانی ل وەزارەتا بازرگانی و پیشەسازی یا هەرێما كوردستانێ گۆت: «ئەوێن پشكا ئاهێن وان یێن خوارنێ هاتیە راگرتن، كەنگی فۆڕما خوە پڕكر، دێ زڤڕنە سەر فۆڕمێن خوە و د مەهێن بهێن دا دێ بۆ وان زڤڕیتەڤە، زێدەتر ژ 700 هزار وەلاتیێن هەرێما كوردستانێ ژ ئەگەرێ تۆمار نەكرنا فۆڕما ئەلكترۆنی یا ئاهێن خوارنێ، پشكا ئاری وەرنەگرتیە و پشكا ئاهێن ڤێ مەهێ ژی وەرناگرن».
ناڤهاتی خویا ژی كر، د پشكا حەفتێ یا ئاری دا، لێبڕین و راگرتنێ ل ئیراقێ و هەرێما كوردستانێ دەست پێكریە، نێزیكی سێ ملیۆن كەسان ل ئیراقێ پشكا حەفتێ یا ئاری وەرنەگرتیە و گۆت: «د ڤێ مەهێ دا پشكا ئاهێن خوارنێ ژی بۆ وان كەسان ناهێت، یێن فۆڕم تۆمار نەكری و ئەو كەسێن ئاهێن خوارنێ ژێ دهێنە بڕین، ناهێنە قەرەبووكرن، كەنگی فۆرم تۆماركر دێ ئاهێن وان هێن».
