بەرپرسەكا وەزارەتا ناڤخۆ: حكومەتا ئیراقێ هاریكاریا ئاوارەیان ناكەت
هەولێر، قائید میرۆ:
بەرپرسەكا وەزارەتا ناڤخۆ یا حوكمەتا هەرێما كوردستانێ ئاشكراكر، حوكمەتا ئیراقێ یا پێگیر نینە ب رێككەفتنا شنگالێ، ئەڤێ چەندێ ژی كاریگەری ل سەر ئاوارەیان هەبووینە و نەشێن ڤەگەڕنە جهێن خۆ و دبێژیت: هاریكاریێن نێڤدەولەتی ژی بۆ ئاوارەیان ب شێوەیەكێ بەرچاڤ كێم بووینە.
سروە رەسول، رێڤەبەرا گشتیا بەرسڤدانا قەیرانان ل وەزارەتا ناڤخۆ بۆ رۆژناما ئەڤرۆ دیاركر، حوكمەتا ئیراقێ یا پێگیر نینە ب رێككەفتنا شنگالێ، ئەڤە ژی بوویە ئەگەر ئاوارەیێن شنگالێ ڤەنەگەڕنە دەڤەرێن خۆ و گۆت: «ئەو ئاوارەیێن بەری نوكە ژی ڤەگەڕیاین ژ ژیانا خۆ پشتڕاست نینن، ئەگەر حوكمەتا بەغدا دخوازیت ئاریشەیا ئاوارەیان چارەسەر بكەت، پێدڤیە پێگیریێ ب رێككەفتنا شنگالێ بكەت و هاریكاریان پێشكێشی ئاوارەیان بكەت».
سروە رەسول گۆتژی: «سەرەڕای كێمبوونا هاریكاریێن نێڤدەولەتی و ئاژانسێن سەر ب نەتەوەیێن ئێكگرتی ڤە بۆ ئاوارەیان، حوكمەتا ئیراقێ و وەزارەتا كۆچ و كۆچبەران ژی هاریكاریان پێشكێشی ئاوارەیان ناكەن، هەتا نوكە زێدەتری 750 هزار ئاوارەیان ل هەرێما كوردستانێ ماینە و ژ ئالیێ حوكمەتا هەرێمێ ڤە هاریكاریا وان دهێتە كرن».
