دربا دەروونی سیستەمێ ژیانا مرۆڤی تێك ددەت
زاخۆ، دلۆڤان هالۆ:
ڤەکۆلەرەکێ جڤاکی دیار کر، دربا دەروونی ئێکە ژ کاریگەرترین نەخۆشیێن دەروونی، ڕەنگڤەدان و کارتێکرنەکا خراب ل سەر ژیانا مرۆڤی دکەت و گۆت؛ ب وی شێوەی کو ئێدی مرۆڤ نەشێت چالاكی و بەرنامەیێن ژیانا خۆ ب درستی بڕێڤە ببەت.
هێمن ڕەفیق، ئەو ڤەکۆلەرێ جڤاکییە د دیدارەکێ دا بۆ ڕۆژنامەیا ئەڤرۆ دیار کر کو، زانایێن دەروونی ل سەر وێ چەندێ هەڤبۆچۆنن و ژ لایێ ڕێکخراوا ساخلەمییا جیهانی ژی هاتیە پشتراستکرن کو دربا دەروونی ژ ئەنجامێ ڕویدانەکا ژ نشکەکێڤە و نە چاڤەرێکری تووشی مرۆڤان دبیت و گۆت؛ وەکو مرنا کەسەکێ نێزیکی مرۆڤی، دیمەنێن کۆشتنا ڕوی ب ڕوی، ڕوودانێن هاتنوچوونێ، کەڤتنە خوار ژ بلنداهییەکێ، ترسا زێدە، ستەما جڤاکی.
ڤەکۆلەرێ جڤاکی د بەردەوامیا ئاخفتنێن خۆدا گۆت؛ هەر ئێک ژ وان خالێن مە ئاماژە پێکری هەکە د ژیانا کەسەکێ دا بهێنە پێش، دێ کارتێکرنەکا نەرێنی ل سەر هەست و دەروون و هزر و بیرێن نەخۆشی کەت کو دبێژنێ دربا دەروونی یا پشتی روودانێ، ئانکۆ شۆکبوونا پشتی ڕوودانێ.
ڤەکۆلەر هێمن زێدەتر گۆت؛ دربێن دەروونی دبنە ئەگەر کو سیستەمێ ژیانا مرۆڤی تێك بچیت و مەژی و هزر و بیرێن مۆڤی تێکەلی وێ ڕوودانێ دبن و بەردەوام دیمەنێن وێ ڕوودانێ وەکو فلمەکێ دهێنە بەر چاڤێن مرۆڤی و نەشێت ژبیر بکەت.
هێمن گۆتژی؛ لەورا هەر کەسەکێ تووشی دربا دەروونی بوو پێدڤیە سەرەدانا نۆشدارەکێ دەروونی بکەت داکو چارەسەریێ وەربگریت.
