ئاریشەیا بەنداڤا گوندێ بیباڤا ل سەرسنكێ دێ هێتە چارەسەركرن
ئامێدیێ، مەحمود نهێلی:
ژ ئەنجامێ كێم بارینان بارانان و هشكەسالیا ئەڤ سالە، ئاڤا بەنداڤا گوندێ بیباڤا ل سنوورێ ناوچەدارییا سەرسنكێ هشكبوویە، هەروەسا رێژەكا زۆرا ئاخێ ژی لێ كومبوویە و بوویە ئەگەر ئاڤ گەلەك تێدا كۆم نەبیت.
ئەندازیار بوتان ئامێدی، بەرپرسێ هۆبا ئاڤدێرییا ئامێدیێ بۆ رۆژناما ئەڤرۆ دیار كر، پشتی گەهشتنا گازندەیا خەلكێ گوندی ل سەر هەبوونا ئاریشەیا هشكبوونا بەنداڤا گوندێ بیباڤا و گۆت: «مە وەكو هۆبا ئاڤدێریێ ل ئامێدیێ، خوە لێ كریە خودان، مە لژنەیەك پێكئینایە و سەرەدانا گوندێ ناڤهاتی كریە و ڤەدیتنەك بۆ هاتیە ئەنجامدان، رێژەیەكا زۆرا ئاخێ تێدا كۆمبوویە، هەروەسا ژ ئەنجامێ كێم بارینا بارانان ئاڤا بەنداڤێ ژی هشكبوویە».
گۆتژی: «مە ڤەدیتن بو لایەنێن پەیوەندیدار بلند كریە و دەمێ پارەیێ پێدڤ بۆ هاتە مەزاختن دەست ب سەخبێركرن و نووژەنكرنا وێ بەنداڤێ دێ هێتە كرن، دیسا خەلكێ گوندی و رێژەكا زۆرا جۆتیاران مفا ژ ڤێ بەنداڤێ وەردگرن، هەروەسا ب سەدان دۆنەمێن ئەردی ل بەر دهاتنە ئاڤدان، ئەڤە زێدەباری خودانكرنا ماسیان د ناڤ ئاڤا بەنداڤێ دا».
