سماقا ئاكرێ ب بلندترین بها هاتە فرۆتن و بەرهەم زێدە بوویە
رەمەزان زەكەریا
سەرەرای هشكەسالیێ و كێم هاتنا بارانان د وەرزێ بووری دا، بەلێ بەرهەمێ سماقا دەڤەرا ئاكرێ ب بلندترین بها هاتە فرۆتن و رێژەیا بەرهەمئینانێ ژی هەمبەر سالا بۆری زێدە ببوو.
ئەندازیار فازل مستەفا ، رێڤەبەرێ چاندنا ئاكرێ بۆ ئەڤرۆ گۆت: ژ ئەگەرێ هشكەسالیێ زیانێن مەزن ب كەرتێ چاندنێ كەفتن، بەلێ بەرهەمێ سماقێ هەمبەر سالا بۆری ب رێژەیەكا باش زێدە بوو و بهایێ وێ ژی گەلەك بلند بوو، جۆرە سماقەك كیلۆیا وێ گەهشتە 9 هزار دیناران.
ناڤبری گۆتژی: ب رەنگەكێ گشتی ئەڤ سالە بەرهەمێن چاندنێ ل دەڤەرێ خراب بوون، بەلێ سماقێ گەلەك ئاڤ پێدڤی نینە، لەورا بەرهەمێ وێ گەلەك باشتر بوو ل سالا بۆری، سماقا دەڤەرا ئاكرێ سێ جۆرن سۆر و سپی و بالیكی و یا سپی گرانترین جۆرێ سماقیێە.
ناڤهاتی خویاكر: سماقا سۆر ل جهێن گەرم باش بەرهەمی دەت، یا سپی و بالیكی هەتا رادەیەكی ل جهێن بلند و سار، ل دەڤەرا ئاكرێ سێ ملیۆن و 500 هزار دارێن سماقێ هەنە، باشترین جۆرێ سماقێ بۆ فرۆتنێ و بهایی یا سپیە و كیلۆ ب شەش هزارا دەست پێدكەت هەتا 9 هزار دیناران و ل سالا 2023 ل ئاكرێ چوار هزار تەن سماق هەبوون، ل سالا 2024 پێنج هزار تەن هەبوون و ئەڤ سالە ل سەر رووبەرێ 9 هزار دۆنەما شەش هزار تەن بەرهەم هاتبوون.
گۆت ژی: سالانە بەرهەمێ سماقێ ل ناڤخۆیا كوردستانێ خواستەكا باش ل سەر هەیە و ب رێژەیەكا باش دهێتە رەوانەكرن بۆ دەرڤەی هەرێما كوردستانێ و حوكمەتا هەرێمێ ژی گەلەك هاریكارە دگەل جوتیاران بۆ رەوانەكرنا بەرهەمێ سماقێ.
