شیمال محەمەد: نڤشەكێ نوو دهێتە بەرهەمئینان و دهۆك ئێكەمە بۆ یارییا تیكۆنجتسۆیێ
پشتی بۆ ماوەیێ دەهـ رۆژان دوهی ب فەرمی خولا عەرەبی یا ڕاهێنەر و دادڤانان ل پارێزگەها دهۆكێ ب دووماهی هات ئەوا 40 ڕاهێنەر و 26 دادڤانانێن عەرەبی و كوردستانی پشكداری تێدا كرین كو ژلایێ فدراسیۆنا یارییا تیكۆنجتسۆیا عەرەبی هاتبوو ڕێكخستن، لدووماهیێ باوەرنامە و پلەكرنا ئاستێ عەرەبی بۆ وان هاتە دان.
ل دۆر ڤێ یەكێ شیمال محەمەد ڕاهێنەرێ یانەیا ئافرەتێن دهۆك و هەلبژارتیێ ئیراقێ بۆ رۆژنامەیا ئەڤرۆ گۆت: دو خول ل سەر ئاستێ ڕاهێنەر و دادڤانێن عەرەبی و كوردستانی ل باژێرێ مە هاتبوو ڕێكخستن كو سەرجەمێ 40 ڕاهێنەران نەهـ ژ پارێزگەها دهۆكێ بوون، و سەرجەمێ 26 دادڤانان پێنچ یێن مە بوون، ئەڤ خولە ژلایێ وانەبێژێن نێڤدەولەتی دهاتە گۆتن، وانەبێژێ دادڤانان عەبدولقادر سەعەد و نابێژێ ڕاهێنەران سەلاح حیبا، ئەز ژی وەكو ڕاهێنەرێ ئیراقێ و وانەبێژێ خولێ بۆ ڕاهێنەران پشكداربووم كو دهێتە هژمارتن ئێك ژ مەزنترین خولێن ل سەر ئاستێ عەرەبی بۆ ڤێ یاریێ هاتییە ڤەكرن.
هەروەسان ناڤهاتی گۆت: پێنەڤێت ئێك ژ خالێن سەركەڤتنا ڤێ خولێ بۆ پشتەڤانییا هەكار محەمەد ئەمین سەرۆكێ فدراسیۆنا تیكۆنجتسۆیا پارێزگەها دهۆكێ كو هەر تشتەكێ پێدڤی بۆ ڤێ خولێ بەرهەڤكربوون، ئەڤێ خولێ گەشبینیەكا دی دامە ئەو ژی نڤشەكێ نوو دهێتە بەرهەمئینان و بەلگەیەكا دی دیاربوویە كو دهۆك ئێكەمە بۆ یارییا تیكۆنجتسۆیێ، بدەستڤەئینانا ڕێزێن ئێكێ ل سەر ئاستێ كوڕان و كچان ژ یانەیێن پارێزگەهێ نە دەرگەڤتینە، ب ئۆمێدین بۆ قارەمانیێن داهاتی دێ ناسناڤێن مەزنتر هەبن.
ل دووماهیێ ناڤهاتی خۆیاكر یاریزانێن كوڕ و كچ ل پارێزگەها دهۆكێ سەنگا خوە یا هەیی نە بتنێ ل سەر ئاستێ ئیراقێ بەلكو ل سەر ئاستێ عەرەبی ژی و شیانێن باش هەنە، لەوما ژی دێ بەرهەڤییان كەین بۆ قارەمانیێن نێڤدەولەتی ل كێشوەرێن ئاسیا، ئەفریقیا و ئۆرۆپا و هەبوونا كۆمەكا ڕاهێنەر و دادڤانان دێ بنە ئەگەرێن پێشئێخستنا ڤێ یاریێ.
بۆ زانین پێشتری مەهەكێ قارەمانییا نێڤدەولەتی ل پارێزگەها دهۆكێ هاتبوو ڕێكخستن، هەر ئێك ژ یانەیا ئافرەتێن دهۆك ل سەر ئاستێ پێشكەڤتیان و تازەپێگەهشتیان، دهۆك لسەر ئاستێ كوڕان لاوان بوونە قارەمان و یانەیێن گارە، تەناهی و پیرس ل رێزێن دویێ و سێیێ هاتن.
