یاریزانێن پارێزگەهێ چاڤ ل دەستكەڤتیێن عەرەبی یە
بۆ ماوەیێ هەیڤەكە هەلبژارتیێن ئیراقێ ل سەر ئاستێن ئاستێن پێشكەڤتی،ئۆلمپی، لاوان، تازەپێگەهشتی د كەمپێ ڕاهێنانێ یێ نافخوە دانە، خوە بەرهەڤكرن بۆ قارەمانییا عەرەبی ئەوا بڕیارە ل سێیێ مەها بهێت باژێرێ سلێمانیێ یا هەرێما كوردستانێ مێڤاندارییا وێ بكەت، دناڤا ڕێزێن هەلبژارتیێ ئیراقێ دا پێنچ یاریزانێن پارێزگەها دهۆكێ دگەل ڕاهێنەرەكی دگەل دانە، ل دۆر دووماهی بەرهەڤیێن وان و هیڤی و ئارمانجا سەرەكی د ناڤ قارەمانیێ‌َ دا، رۆژنامەیا ئەڤرۆ بۆچوونێن جودا وەرگرتینە و بڤی شێوەیی بوویە.
تارق سەعید ڕاهێنەرێ یانەیا دهۆك و هەلبژارتیێ ئۆلمپیێ ئیراقێ گۆت: پشتی ئەو ئاست و ئەنجامێن ژ هەژی یێن ڕێزێن ئێكێ و دویێ ئیناین، ب خوەشحالی ڤە پێنچ یاریزانێن پارێزگەهێ بۆ ناڤ ڕێزێن هەلبژارتیێ ئیراقێ هاتبوونە داخوازكرن ئەوژی سێ یاریزانێن یانەیا دهۆكێ ل سەر ئاستێ لاوان، ئاڤەند هشیار فەریق، یوسڤ جیهاد و عیسا عەلی، ژلایەكێ دووڤە دو یاریزانێن دی خەلكێ پارێزگەهێ نە و یاریێ بۆ یانەیێن دەرڤەیی پارێزگەهێ دكەن ئەو ژی وەهبی سلیمان ژ یانەیا سیناعە یا بەغدایی بۆ ئۆلمپیێ ئیراقێ و سەربەست عەبدوللا ژ یانەیا كۆیە یا هەولێری بۆ ئاستێ پێشكەڤتیان دێ پشكداربن.
هەروەسان ناڤهاتی گۆت: ئەڤ قارەمانییە ئێك ژ ب هێزترین قارەمانی نە ل سەر ئاستێ ئاسیا و ئەفریقیا، ژبەركو دێ هەلبژارتیێن وەكو ئیمارات، تونس، مەغرب، بەحرێن، كوێت، مسر، ئوردن، قەتەر، لوبنان زێدەباری چەند وەلاتێن دی پشكدارن ئەوێن سەربۆرەكا درێژ و ئەنجامێن سەرفەراز د كێشوەرێن ئاسیا و ئەفریقیا دا هەبووینە، بۆ گەلەك گرنگە پشكدارییا پێنچ یاریزانێن دهۆكێ، ئەڤە بۆ ماوەیێ هەیڤەكە ل باژێرێ سلێمانیێ د كەمپەكێ ڕاهێنانێ داینە و بەرهەڤی دێ بەردەوامبن، ژبەركو مێڤاندارین دڤێت چەندین ناسناڤان ل سەر ئاستێن جودا بدەستڤە بینن و گەشبینین بۆ ڤێ ئارمانجێ.
ژلایێ خوەڤە وەهبی سلێمان یاریزانێ پارێزگەهێ و ئۆلمپیێ ئیراقێ گۆت: پێخوەشحالم ئێك ژ یاریزانێن دناڤ ڕێزێن هەلبژارتیێ ئیراقێ دامە، مە بەرهەڤیێن باش كرینە و بەردەوامین، دێ هەموو بزاڤا كەین و هەتا دووماهی چركە نا ڕاوەستیین شەڕی بۆ ڕێزێن ئێكێ كەین، دووماهی ناسناڤێ من ل چینێ بوو د قارەمانییەكا نێڤدەولەتی یا ڤەكری دا، ئەو بوویە پالدەر بۆ ڤێ قارەمانیێ ژبلی ڕێزا ئێكێ هیچ ڕێزەكا دی هزر تێدا نەكەم، من باوەری ب ئاست و شیانێن خوە هەیە و ب پشتەڤانییا ڕاهێنەرێ خوە تارق سەعید و فدراسیۆنا ئیراقێ دێ گەهینە ئارمانجا خوە.
د داخویانیەكا رۆژنامەڤانی دا یێ ئیماراتی فەیسەل بن حەمید ئەلقاسم سەرۆكێ فدراسیۆنا عەرەبی یا یارییا پایسكلان بۆ دەزگەهێن ڕاگەهاند گۆت: دهێتە پێشبینیكرن قارەمانییا وەرزێ ئەڤ سالە یا جودا بیت ژ قارەمانیێن پێشتر یێن مە، ژبەر هەبوونا هندەك خالێن تایبەت، ژ وانا پشتی 40 سالێن ڤەقەتیانێ دوبارە ئیراق ڤەگەڕیا هەڤڕكیێن قارەمانییا ب مێڤانداریكرنەكێ، هەروەسان سرۆشتێ كوردستانێ دێ بیتە خالا سەركەڤتنا ڤێ قارەمانیێ ژبەركو پێشتر پرانییا قارەمانیێن مە ل جهێن ڤەدەر و جادەیێن ڕاست بووینە، ئەڤچارە دێ كەڤیتە بەرانبەر چیا و نەهال و شرۆشتەكێ جوان.
ژلایێ خوەڤە تارق سەعید ڕاهێنەرێ هەلبژارتیێ ئیراقێ و یانەیا دهۆكێ گۆت: پێخوەشخالین دگەل پێنچ یاریزانان ئەم دناڤ ڕێزێن هەلبژارتیێ ئیراقێ داینە و ئەڤە نە جارا ئێكێ یە بەلكو دگەهیتە زێدەتری 10 سالان، ل سەر ئاستێ تازەپێگەهشتی، لاوان و پێشكەڤتیان یاریزانێن پارێزگەهێ بەردەوام بووینە و دەستكەڤت ژی ئیناینە ل سەر ئاستێ عەرەبی و ئاسیا و نێڤدەولەتی.
هەروەسان گۆت: بۆ قارەمانییا عەرەبی ل دووڤ پلانا هاتییە دانان كەمپێن نافخوە و دەرڤە دهێنە دانان، مە باوەری ب شیانێن یاریزانێن خوە هەنە دێ ئاست و ئەنجامێن گەلەك باش دەستڤە ئینن، ڕاهێنانێن مە د بەردەوامن، یا دشیان دا بیت دێ هێتە كرن.
