مالپەرەكێ ئەمریكی: ئیراق دێ بیتە مەیدانا ئێكلاكرنا ناكۆكیێن د ناڤبەرا ئیسرائیلێ و ئیرانێ دا
مالپەرەكێ ئەمریكی بەلاڤكر، پێشبینی دهێتە كرن ل پاشەڕۆژێ ئیراق ببیتە مەیدانا ئێكلاكرنا ناكۆكیێن د ناڤبەرا ئیسرائیلێ و ئیرانێدا، هەروەسا ئاماژەكر كو كێشانا سەرپشككرنا شەڕی ل ئیراقێ و كەنداڤی، ب رامانا گرێدانا ئێكجاری یا دەستهەلاتا سەرۆكێ ئەمریكا ب ئەنجامدانێ هێرشان ناهێت.
ل ڤێ دووماهیێ، كۆنگرێسێ ئەمریكا ئەو فەرمانا سەرپشككرنا سەرۆكێ ئەمریكا ڤەكێشا كو بۆ راگەهاندنا شەڕی ل سالا 2002 بۆ هێرشكرنێ ل سەر ئیراقێ و كەنداڤی دەكربوو.
كەنالێ (وەن نیوز) یێ ئیراقی ب پشتبەستن ب مالپەرێ (Task & Purpose) یێ ئەمریكی بەلاڤكر» پێشبینییا وێ چەندێ دهێتە كرن كو ئیراق ببیتە مەیدانا ئێكلاكرنا ناكۆكیێن د ناڤبەرا ئیسرائیلێ و ئیرانێدا ب جۆرەكی كو نوكە ئیراق بوویە مەیدانەكا ڤەكری ل پێشبەری هێرشێن هوور یێن ئیسرائیلێ».
ئەوژی بەرچاڤكر كو چاڤەڕێ دهێتە كرن ئیسرائیل وان پێگەهان توپباران بكەت كو گومانا وێ چەندێ لێ دهێتە كرن، گرێدای ئیرانێ بن.
د پشكەكا دی یا راپۆرتا وی مالپەرێ ئەمریكی كو مالپەرەكێ تایبەتە ب ڤەگوهاستنا دەنگوباسان ل دۆر كاروبارێن سەربازی و شەڕكەرێن دێرین و ئالیێ بەرگرییا ئەمریكا، ئەو چەندە هاتە بەرچاڤكرن» هەتا هەكە ئەمریكا ژی سەرپشككرنا شەڕی ل ئیراقێ و كەنداڤی ڤەكێشیت، هێشتا سەرۆكێ ئەمریكا دێ بەهانەیەكا دی هەبیت بۆ ئەنجامدانا هەر كریارەكا سەربازی، بەلێ ڤەكێشانا راگەهاندنێ شەڕی ل ئیراقێ ژ ئالیێ كۆنگرێسیڤە، رامنا وێ ئەوە ئەمریكا دخوازیت خوە ژ روو ب رووبوونا راستەخوە ل ئیراقێ و سووریێ و لوبنانێ ڤەكێشیت، د بەرانبەردا ئازادییەكا بەرفرەهتر بۆ لڤینا سەربازی بدەتە ئیسرائیلێ».
