كەڤالێن من دەربڕینێ ژ هەبوون و بۆریێ من دكەن
هەرهین محەمەد:
شێوەكار (عەلی ئارت) د دیدارەكێ دا بۆ بەرپەرێ هونەری یێ رۆژنامەیا ئەڤرۆ گۆت: ئەز كەڤالێن خوە ل سەر شێوازێ ژیواری چێدكەم و داخبارێ سرۆشتێ كوردستانێ و تشتێن فولكلۆری مە و كەڤالێن من دەربڕینێ ژ هەبوون و رابۆریێ و جهێ ئاكنجیبوونا من دكەن و دچێكرنا كەڤالان دا نەشێم نامەیێن خوە بۆ خەلكی ب گەهینم، چونكو دەمێ ئەم كارەكی هونەری دكەین ئەم بۆ خوە كاردكەین نە بۆ خەلكی و دبیتە كاری هونەری، بەلێ د ڤی سەردەمی دا و مایتێكرنا گەلەك خەلكی و گەلەك سەرپەرشتیاران ئەوێن كار ژێ دهێتە وەرگرتن و ب سەر پەرشتیا وان بیرو هزر و بۆچوون دهێنەكرن، بۆ نموونە هەر پرۆژەیەكێ بهێتەدانان ب سەرپەرشتیا ئەندازیاران دهێتە دانان و ئەو دێ هزرا مرۆڤی راوەستینت و هزرا خوە کەتە دناڤ كارێ مرۆڤی یێ هونەری دا و ل وی دەمی داهێنانا مرۆڤی هەموو دبیتە كارەكێ ئەندازیاری وخەلكێ مە پتر باوەری ب ئەندازیاری هەیە و ئەو سەرپەشتیا كارێ وی یێ هونەری بكەت و ئەو كاری دهێتە كرن كارەكێ ئەندازیاری یە نەكار و داهێنانا هونەرمەندی یە و ئەڤە ژی جهێ مخابنیێ یە و گەلەك كارو پرۆژە و دیزاینێن مالان من ئەنجامداینە و ئەندازیاری كارێ خوە كریە دناڤدا و بوویە هزرەكا ئەندازیاری.
هەروەسا گۆت: بەرنیاس بوون تشتەكی گرنگە بۆ هونەرمەندی و هەكە هونەرمەندی چەند كاركربیت و یێ زیرەك بیت و چو بەرنیاس بوون نەبیت و كارێ وی یێ بەرزەبیت و گەلەك یا گرنگە هونەرمەند ل دووڤ بەرنیاس بوونا خوە بچیت و ناڤێ خوە هەبیت دناڤ خەلكی دا و هەركارەكێ ئەم ئەنجام د دەین ل نك كەسەكێ دی پرسیار دكەت ئەڤ كارە تە ب چەندێ کریە، بەری بێژیت ئەو چ كاربوو چەند یێ سەركەفتی بوو و دڤێت هونەرمەندی كارێن جودا هەبن.
