سێ وەلاتێن ئۆرۆپی ب توندی هۆشداریێ ددەنە ئیرانێ
د چارچۆڤەیێ کۆمبوونا نەتەوەیێن ئێکگرتی دا وەزیرێن دەرڤە یێن هەر سێ وەلاتێن ئەلمانیا، بریتانیا و فرەنسا ل گەل وەزیرێ دەرڤە یێ ئیرانێ کۆمبوون و تێدا ب توندی هۆشداری دانە ئیرانێ کو نابیت ئیران ب چو رەنگەکێ ببیتە خوەدانا چەکێن ئەتۆمی و هەروەسا داخواز ژ ئیرانێ ژی کرن ب رەنگەکێ راستەوخوە ل گەل ئەمریکا دەست ب دانوستاندنان بکەت، هەک ئیران کارەک وەسا نەکەت دێ ب توندی هێتە سزا دان.
ئەو یەک د دەمەکێ دایە کو بەری دو رۆژان عەلی خامنەیی رێبەرێ ئیرانێ ژی دیار کر، دانوستاندن ل گەل ئەمریکا ژ بلی زیانێ چو مفایێن خوە بۆ ئیرانێ نابن و دڤێت ئیران ب چو رەنگەکێ ل گەل ئەمریکا دانوستاندنان نەکەت، نابیت شاندێ ئیرانێ یێ ل ئەمریکا کارەک وەسا بکەت، چونکی ئەزموونا چەندین سالێن بۆری سەلماندیە ئەمریکا پێگیریێ ب چو رێککەفتنێن ل گەل ئیرانێ نەکریە و نابیت ئێدی ل گەل ئەمریکا دانوستاندن بهێنە کرن.
