كارێ ئەكتەریێ گەلەكێ ب زەحمەت و وەستیانە
سندس سالح سلێڤانەیی:
ئەكتەرێ بەرنیاس (سیروان گویی) د دیدارەكێ دا بۆ بەرپەرێ هونەری یێ رۆژنامەیا ئەڤرۆ گۆت: دژیەكێ بچووكدا من حەزژ كارێ ئەكتەریێ دكر و ل سالا 2007 ئەز چوومە پەیمانگەها هونەرێن جوان، چنكو من دڤیا ب رێكا ئەكادیمی فێری كارێ هونەری ببم و خزمەتا وەلاتێ خوە بكەم و هەر بەرهەمەكێ من پشكداری تێدا كری ئەز یێ پێ دلخۆشم.
هەروەسا گۆت: هەلبەت كارێ ئەكتەریێ گەلەكێ ب زەحمەت و وەستیانە، بەس بۆچی من ئەڤ كارە هەلبژارت چنكو هەر كارەكێ هەموو بشێن ئەنجام بدەن بۆ من كارەكێ گەلەك نۆرمالە و چو جاران نابیتە هیڤیا من، ئانكو كارێ ئەكتەریێ گەلەكێ تایبەتە و یێ جوودایە ژ هەموو كاران و كەسێن تایبەت پێ دڤێن، چنكو كارەكێ ب زەحمەت و ماندیبوونە و پێدڤی ب هزرێن باشە، ژبەر هندێ من ئەڤ كارە هەلبژارت، چنكو كارەكە پەیامەكا مەزن یا د دووڤدا هەی، لەورا ئەز حەزژ وان هەموو رۆلان دكەم یێن من د شانۆگەری و دراما و فلمێن سینەمایی دا گێڕاین و هەر كارەكێ هەكە من حەزژێ نەكربیت و باوەری پێ نە بیت من ئەنجام نەدا، هەلبەت د كارێ هونەری ژی زەحمەت و ئاستەنگ گەلەكن و هەتا مرۆڤ دشێت وان ئاستەنگان دناڤ جڤاكی دا دەربازكەت گەلەكا ب زەحمەتە، لەورا دێ بێژم هەموو كەس نەشێن ببنە هونەرمەند و كارێ هونەری بكەن، بەلكو كەسێن تایبەت پێ دڤێت.
ل دووماهیێ گۆت: رەوشا درامایا كوردی ئەز گەلەك خراب دبینم و ب باشی نابینم و ئەڤا ئەم دكەین بتنێ بزاڤەكە یانژی سەرهلدانەكە و هەتا ئەڤ كارە نەبیتە پیشەیەك ئەز ب باشی نابینم و هێشتا ئەم یێ ل دەستپێكێ، ئانكو وەكو مرۆڤ ل سەر پایسكەكێ دكەڤیت ئەم دەرجكەكێ یان دوا یێن یێن ب سەركەفتین، بۆ زانین من ل گەل گەلەك دەرهێنەران كاركریە، ژوانا هندەك دەرهێنەرێن بیانی بوون كو رۆلێ من ل گەل وان یێ كێم ژی بوو بەس دباش بوون و بۆ وان گەنجێن حەزا ئەكتەریێ پێدڤیە باش بخویین، هەروەسا باش خوە ب وەستینن هەتا بشێن ببنە ئەكتەرێن باش و ئەز هەموو دەمان وەكو پێشمەرگەیەكێ كاركری یێ ب رەخت و فیشەك بۆ هەر بەرهەمەكێ نوو یێ بەرهەڤم، لێ ب وی مەرجی بەری هەر تشتەكی ئەز دەقی ببینم و باش بخوینم و هەكە رۆلێ من یێ ب دلێ من بیت دێ پشكداربم.
