مۆزیك هه‌رده‌م د ژیانا من دایه
زنار تۆڤی:
هونه‌رمه‌ند نیهال گه‌نچ، خه‌لكا چه‌ولیكێ یه ل ل باكوورێ كوردستانێ، بۆ رۆژناما ئه‌ڤرۆ دبێژیت: ژییێ من سێ سال و نیڤ بوون، ئه‌ز ل گه‌ل خێزانا خوە هاتیمه ئیستانبولێ و نوكه ژی ئه‌ز ل وی باژێری دژیم، ئه‌ڤه 10 سالن ئه‌ز د وارێ هونه‌ری دا كاردكه‌م، موزیك هه‌رده‌م د ژیانا من دایه، به‌لێ هنده‌ك جاران ژ ئه‌گه‌رێ كاروبارێن ژیانێ، ئه‌ز گه‌له‌ك د وارێ هونه‌ری دا دیار نه‌بوویمه، هه‌ر چه‌نده هه‌رده‌م من بزاڤكرینه، كاره‌كێ باش د وارێ هونه‌ری دا بكه‌م، وه‌ك مۆزیكژه‌نه‌كا سه‌ربه‌خۆ هه‌ولدده‌م و كاردكه‌م، ژ پێخه‌مه‌ت بشێم به‌رده‌وامبم ل سه‌ر كارێ خۆیی هونه‌ری.
ناڤهاتییێ گۆت ژی: به‌ری 10 سالان، من سترانه‌ك ب ناڤێ زڤستان تۆماركر، ئه‌و سترانه بوویه ده‌ستپێكا كارێ من یێ هونه‌ر و موزیكێ، پاشی ل سالا 2020 ێ، من ئه‌لبۆمه‌ك ب ناڤێ ( شه‌ڤ) به‌لاڤكر، كو ژ وێ ئه‌لبۆمێ 5 ستران ژ تێكست و ئاوازێن من بوون، من سترانه‌كا هه‌لبه‌ستڤان به‌ركه‌ن به‌ره‌ه یا ب ناڤێ ( چووین) به‌لاڤكر، پاشی من سترانه‌ك ب زاراڤێ سۆرانی ( وه‌ره قوربان ) گۆت، هه‌روه‌سا دو ستران ژی یێن فولكلۆری بوون، كارێ ئارانجۆیێ ژی ژ لایێ رۆنی ئارانڤه بۆ هاتبوو كرن.
نیهالێ ئاشكرا كر ژی: پشتی هزركرنێ و شیره‌تكاری و كاركرنێ، من دڤیا د وارێ موزیكێ دا به‌رده‌وام بم، له‌وما من ڤییا هنده‌ك ژ وان سترانێن من یێن كو به‌ری نوكه من گۆتین بێژمه‌ڤه، هه‌روه‌سا من سترانێن نوو ژی گۆتن، ژبه‌ركو ئه‌ز دخوازم ب ستران و هونه‌رێ خۆ بهێمه نیاسین، هه‌روه‌سا ئه‌ز ل گه‌ل كۆمه‌كا موزیكژه‌نێن خۆدان شیان كاردكه‌م، من ڤیایه سترانێن خۆ ئێك ئێكه ب ره‌نگه‌كێ زیندی و ب ڤیدیۆ ل مال تۆمار بكه‌م، هه‌تا نوكه سێ سترانێن من ب وی ره‌نگی د ئاماده‌نه، هنده‌ك ژی هاتینه به‌لاڤكرن، ئه‌وێن دیتر ژی ل ڤان نێزیكان دێ هێنه به‌لاڤكرن، هه‌روه‌سا د ده‌مێ بهێن دا من دڤێت ل گه‌ل هونه‌رمه‌ندێن وه‌كو میكائیل ئاسلان و خێرۆ عه‌باس و ئاینور و مه‌م ئارارات گازی بكه‌مه مالا خۆ و سترانان ب هه‌ڤرا بێژین، ئه‌ز ڤێ چه‌ندێ وه‌كو داخوازی و خه‌یالا خۆ یا پاشه‌رۆژێ دبینم.
ل دووماهییێ گۆت ژی: ب ره‌نگه‌كێ به‌رده‌وام ئه‌ز ل سازییه‌كا هونه‌ری كاردكه‌م، له‌وما نه‌شێم هه‌موو ده‌مێ خۆ بۆ هونه‌ری ته‌رخان بكه‌م، ب تنێ ل ده‌مێ بێهنڤه‌دانێ دشێم كارێن هونه‌ری بكه‌م، هه‌روه‌سا به‌رهه‌م زۆر هه‌نه، به‌لێ ئه‌و به‌رهه‌مه د میدیایان دا وه‌كو پێدڤی ده‌رناكه‌ڤن، ب تایبه‌تی د میدیایێن سه‌ره‌كیدا، هه‌ر چه‌نده دبیت وه‌كو جاران قه‌ده‌غه‌كرنا توند ل سه‌ر موزیكا كوردی نه‌بیت، به‌لێ چ پشته‌ڤانی و ئاسانكاری ژی نینه، له‌وما هونه‌رمه‌ند پتر پشت به‌ستنیچ ل سه رخۆ دكه‌ن و كارێن خۆ یێن هونه‌ری به‌لاڤ دكه‌ن، ژ به‌ر وان مه‌رجان و به‌رده‌وامییێ ل سه‌ر كارێ هونه‌ری، من بریار دا د مالا خۆ دا ستۆدیۆیه‌كێ چێكه‌م و كارێن خۆ یێن هونه‌ری ل وێرێ تۆمار بكه‌م، هه‌روه‌سا ژ بلی سۆشیال میدیایێ، ل باكورێ كوردستانێ، مه ئه‌و ده‌لیڤه نینه كو ئه‌م ستران و به‌رهه‌مێن خۆ ل رادیۆ و تیڤییان به‌لاڤ بكه‌ین، هه‌روه‌سا مه‌زنترین ئاسته‌نگ نه‌بوونا شانۆیێ ییه بۆ هونه‌رمه‌ندێن كورد ل باكور، ب مخابنی ڤه هێشتا ل پرانییا فه‌ستیڤال و شانۆیان دا گه‌له‌ك كێم هونه‌رمه‌ندێن كورد دهێنه دیتن،هیڤی و داخوازا مه ئه‌وه، كو زێده‌تر ده‌لیڤه بۆ وان بهێته پێش و پتر پشكدارییێ د كارێن هونه‌ری دا بكه‌ن.
