رەوشەنبیرێن تورکیا هۆشداریێ ددەنە دەستهەلاتێ
هژمارەک ژ نڤیسەر و رەوشەنبیرێن تورکیا داخواز دکەن لەز د قووناغا ئاشتیێ دا بهێتە کرن، هەکە هندەک پێنگاڤن بەرچاڤ نەهێنە ئاڤێتن هندەک هێزێن ڤەشارتی دێ جارەکا دی بزاڤا ژناڤبرنا قووناغا ئاشتیێ ل تورکیا کەن و ئەو یەک دێ زیانێن خوە یێن مەزن هەبیت.
هژمارەک ژ نڤیسەر، رەوشەنبیر و کەسانێن ئەکادیمی یێن کورد و تورک د داخویانیێن جودا جودا دا دیار کرن، کو قووناغا ئاشتیێ ژ بۆ تورکیا گەلەک یا گرنگە، نها شەڕ هاتیە راگرتن و ئەو یەک بوویە جهێ دلخوەشیا هەموو وەلاتیێن تورکیا، ئەزموونا چەند مەهێن بۆری سەلماند کو ل تورکیا کورد و تورک ل دژی شەڕی نە و هەموویان ئاشتی و پێکڤەژیان دڤێت، ژ بەر ڤێ یەکێ ژی گرنگە دەستهەلات ب کریاری هندەک تشتان بکەت، دڤێت لەز د برێڤەچوونا قووناغا ئاشتیێ دا بهێتە کرن و پێنگاڤێن بەرچاڤ ژی بهێنە ئاڤێتن، هەکە ئەو یەک نەهێتە کرن دبیت هندەک هێزێن ڤەشارتی دیسان ل تورکیا کار بۆ ژناڤبرنا قووناغا ئاشتیێ بکەن و وی دەمی دێ زیانێن گەلەک مەزن گەهنە تورکیا.
ل ئالیێ دی جەنگیز چاندار ئەندامێ پەرلەمانێ تورکیا سەر ب فراکسیۆنا دەم پارتی ژی دوهی دیار کر، هەلوەستێ نها یێ دەستهەلاتێ د جهێ خوە دا نینە، کورد دلگرانن کا بۆچی هەتا نها دەمیرتاش و گرتیێن دی یێن سیاسی نەهاتینە ئازاد کرن، دڤێت دەولەتا تورکیا هندەک پێنگاڤان بهاڤێژیت دا ببیتە جهێ دلخوەشیا هەموو وەلاتیێن تورکیا ب تایبەتی ژی کوردان، لێ مخابن هەتا نها دەستهەلاتێ ئەو یەک نەکریە.
ئەو یەک د دەمەکێ دایە کو بەری چەند رۆژان جێگرێ سەرۆکێ پارتا بزاڤا نەتەوەپەرست یا تورکیا ژی دیار کربوو هەتا نها سێ جاران دادگەها بلند یا مافێن مرۆڤی یا ئۆرۆپا بریارا ئازادکرنا دەمیرتاشی دایە و دڤێت دەولەتا تورکیا ژی ئێدی ئاستەنگان ل هەمبەر ئازادکرنا دەمیرتاشی دروست نەکەت، چونکی دەمیرتاش هەتا نها ژی ب رەنگەکێ گەلەک باش پشتەڤانیێ ل قووناغا ئاشتیێ دکەت و گرنگە دەمیرتاش د زووترین دەم دا بهێتە ئازاد کرن، ئازادکرنا دەمیرتاشی دێ بیتە ئەگەرێ دلخوەشیا گەلەک وەلاتیان و دێ کاریگەریا خوە یا گەلەک باش ژ بۆ قووناغا ئاشتیێ ژی هەبیت، دڤێت دەستهەلات ژی هەتا ٨ ڤێ مەهێ بریارا ئازادکرنا دەمیرتاشی بدەت، چونکی ژ بۆ ئاشتیێ و پێکڤەژیانێ دڤێت ب کریاری هندەک تشت بهێنە کرن.
