تێگەهـێ سیاسـی و وارگـەهـێ كـوردی
سیداد یاسین
سیاسەت بنچینەیا ئاڤاكرن و نوێ ڤەبوونا وەلاتێن دیمۆكراتە د جیهانا مودێرنیزمێ دا، سیبەرەكە هەموو بنەمایێن دیموكراسیەت و پێكڤەژیانێ ل ژێرن، پێناسەیێن جودا هەنە ژبۆی تێگەهێ سیاسی، لێ ئەز دێ بۆ ڤێ پێناسەیێ كورت كەم، سیاسەت ئەو هونەڕێ برێڤەبرنێ یە كو بەرژەوەندیێن كۆمەكێ یان تاكەكێ ل سەر دپەندن، دشێن بێژین ئالوگۆركرنا پەیوەندیانە، ژبۆ ب دەستڤەئینانا ئارمانجێن تایبەت و گشتی ژبۆی تاكەكێ یان چەند تاكان، هەلبەت دابەشكرنا سیاسەتێ ب شێوەیەكێ گشتی، چەندین ئاراستەیان ب خۆڤە دگریت، لێ دێ ل سەر تێگەهێ سیاسیێ تاكێن وارگەها كوردی راوەستم.
نێزیكە تێگەهێ سیاسی تایبەتمەندیا خۆ ژدەستبدەت، تاكێ كورد ئێدی ب شێوەیەكێ هۆڤانە سیاسەتێ دكەت، كو دویرن ژ هەموو ئامرازێن قەبوولكرنێ و ئاشتی و وەكهەڤیێ، گەر چاڤێن خۆ ل تاكەكێ ڤێ وارگەهێ بگێرینین؛ دێ بینی ژ پێخەمەت بیروباوەرێن خوە یان بیروباوەرێن نە وەكهەڤ دگەل برادۆستەكێ خۆ، دكارت پەنایێ ژبۆی پۆختان و هێرشا سەر زمان و ئێشانا جەستەیی ببەت، هەلبەت ئەڤ هەڤڕكییە پشكەكن ژ سیاسەتێ د هندەك فاكتەرێن راست و دروست دا، نەك د هندەك چارچووڤەیێن وەسا ئاسێ دا كو ئێدی ژ بنەمایێ خۆ دەركەڤیت، ئەڤە وەكو تاكێن گشتی لێ دێ بێژین، سیاسی كینە؟
هەلبەت سیاسەتمەدارێن راستەقینە ئەون كو سیاسەتا خۆ دكەنە د بەرژەوەندیا گەل و وەلاتی دا ژبۆ خزمەتكرنا هەڤوەلاتیان، دبیت د پەیسكەكا سیاسەتكرنێ دا سیاسەتمەدار ل بەرژوەوەندیا خوە بنێڕیت، لێ نابیت ئەڤ لێ نێرینە ل سەر بڕبرە پشتەیا هەڤوەلاتیان بیت، لەو گەر لێنێرینێ د سیاسەتمەدارێن ساڤا بكی ل كوردستانا مەزن ب گشتی ئەو سیاسیێن ژنویكا ژ پێكا سیسەتێ ڤەخوارین د ڤان ۱٥ سالێن دەربازبووی دا، دێ بینین كو پتریا وان بووینە جهێ بێزارییا هەڤوەلاتیان و تاكێن نوی یێن وەلاتی بەر ب تێگەهەكێ سیاسی یێ شاش ڤە دبەن، كو ئەڤێ ژی دێ كارڤەدانێن مەزن ژبۆی نەوەیەكێ نوی هەبن كو ب شاشی سیاسەتكرنێ هەم د ناڤ خۆ و دەرڤەدا بكەن، لێ پڕانیا سیاسیێن مەزنێن كورد شیاینە دەست ب كلیلا سیاسەتێ د دەمێن بۆری دا بگرن، سەدەیێ بیستێ مینا (قازی و شێخ مەحموود و سمكۆیێ شكاك و مەلا مستەفایێ بارزانی و شێخ سەعیدێ پیران و گەلەكێن دی) هەروەسا ژ وان سەركردەیێن كو بزاڤێن وان گەهەشتینە سەدەیێ ۲۱ێ ب ئامانج ڤە مینا (سەرۆك مسعود بارزانی و سەرۆك مام جەلال و كاك نێچیرڤان بارزانی و مسرۆر بارزانی)، بتایبەتی رۆلێ بەرێز مسعود بارزانی و مام جەلال تالەبانی كو رۆلەكێ مەزن و كاریگەر بوو پشتی ژناڤبرنا حوكمەتا بەعس كو گاریگەریا ژیرانەیا سیاسەتكرنا هەردو سەركردەیێن ناڤبری كاریگەرییەكا مەزن بوو ل سەر هەموو رۆژهەلاتا ناڤین دا.
