سوبەهی (دیدارا سێیێ یا ئەدەبێ ژنان) ل دهۆكێ دێ دەستپێكەت
شاكر ئەنروشی:
ب پشتەڤانیا رێزدار (پ.د عەلی تەتەر) پارێزگەرێ دهۆكێ و ل ژێر درۆشمێ (ئاڤاكرنا هزران و فڕینا هەستان د ئەسمانێ ئەدەبیاتێ دا) رێڤەبەرییا گشتی یا رەوشەنبیری و هونەری ل پارێزگەها دهۆكێ، رێڤەبەرییا چالاكیێن وێژەیی، ل بەرە سوبەهی رۆژا دوشەمبی رێكەفتی 13/10/2025 ل دەمژمێر دەهی سپێدێ ل هولا ئۆتێلا ژیان دەست ب رێورسمێن گێڕانا (دیدارا سێیێ یا ئەدەبێ ژنان) بكەت و بۆ دەمێ دو رۆژان دێ یا بەردەوام بیت.
حەسەن فەتاح، پەیڤدارێ رێڤەبەرییا گشتی یا رەوشەنبیری و هونەری ل پارێزگەها دهۆكێ، ل دۆر وێ دیدارێ بۆ رۆژنامەیا ئەڤرۆ گۆت: دیدارا ئەدەبیاتا ژنێ بۆ سالا سیێ یە ژلایێ رێڤەبەرییا گشتی یا رەوشەنبیری و هونەری ل پارێزگەها دهۆكێ، رێڤەبەرییا چالاكیێن وێژەیی ڤە دهێتە سازكرن، نوكە بوویە ئێك ژ چالاكیێن سالانەیێن جێگیر كو وەك ستراتیژییەت مە ل بەرە سالێن بهێت ژی بەردەوام بیت و ئارمانجا مە ژڤێ دیدارێ ئەوە كو ب دیتنا مە ژن دوو جاران خزمەتا بیاڤێ ئەدەبیاتێ دكەت، گەلەك میناك هەنە كو ژنێن داهێنەر و بلیمەت هەبووینە و خزمەتا ژانرێن جودا یێن ئەدەبیاتێ كرینە، ژلایەكێ دیڤە ئافرەت دبیتە ئالاڤ و كەرەستە و پەسن بۆ بابەتێن شعر، چیرۆك، رۆمان و بابەتێن جودا یێن ئەدەبیاتێ، نەخاسمە ژنا كورد كو هە ر تشتێ وێ بالكێشە، چ وەك كابانییا مالێ یان وەك رێنجبەر و كاركەر مل ب ملێ زەلامی یان دەیك یان ژی هەڤژین، دیسان ب كاروكۆك و جوانیا خۆ ژنا كورد جوداهییا و تایبەتمەندییا خۆ هەیە، هەروەسا جل و بەرگێن ژنا كورد جودا و جوانن، ئەڤە هەموو وە دكەن كو ئەم دشێین بێژین ژنا كورد دبیتە قارەمانا گەلەك بیاڤێن ئەدەبیاتی
هەروەسا گۆت: ئارمانجا مە ل رێڤەبەرییا گشتی یا رەوشەنبیری و هونەری ل پارێزگەها دهۆك ژ ڤێ دیدارێ ئەوە سالانە ڤان مژارێن مە بەحس كری بەرچاڤ بكەین، چ ژن وەك نڤێسەر چ ژی ژن وەك بابەتێ ڤان بیاڤان بهێنە شرۆڤەكرن و گەنگەشەكرن.
