سروشتی ڕۆلەکێ مەزن د پەیدابوونا هونەرمەندان دا هەیە
زاخۆ، دلۆڤان هالۆ:
هونەرمەندێ ناڤدارێ کورد و دەنگ خوەش یێ ئیدارا سەربخوە یا زاخۆ سەمیر زاخۆیی، د دیدارەکێ دا بۆ ڕۆژناما ئەڤرۆ دیار کر کو ژیێ زاڕۆکینیێ قوتابخانەیە بۆ مرۆڤی، مرۆڤ گەلەك تشتان د وی ژییێ دا فێر دبیت، و سەربۆران ژ دەوروبەرێن خۆ وەردگریت، دا کو ژیانا خۆ پێ برێڤە ببەت، مالا مە ل بەر لێڤا خابیرێ زاخۆ بوو، نوکە ژی خانیێ بابێ منە، ژ دەرگەهێ حەوشێ مرۆڤ دەرکەڤیت بەرامبەر وێ ئاڤە، و ل وەرزێ هاڤینان مە وەرز چێدکرن، مە د کولان و مە خیار و زەبەش و گۆندور د چاندن، و مە ژێ دخار و مە د ددانە هەڤال و جیرانان، و مە کەپر چێدکرن چونکی سرۆشت هونەرمەندی دروست دکەت، سرۆشتی ڕۆلەکێ مەزن د پەیدابوونا هونەرمەندان دا هەیە، ل دووماهیا سالێن پێنجیان من ئامیرێ بلوولێ دژەنی و ئەز زیرەك ژی بووم دڤی بواری دا، ل سالا 1963 من دەست ب مۆزیکێ کر، و من ئامیرێ عودێ دژەنی و پشتی هینگێ کەمان دژەنی، خودێ ژێ ڕازی هونەرمەند تەحسین تەها ئەز پالدام بۆ ژەنینا ئامیرێ کەمانێ، پشتی هینگێ من هندەك ژی فێرکرنە ئامیرێن مۆزیکێ.
ناڤهاتی ئاماژە ب وێ چەندێ ژی کر کو بۆ گۆتنا سترانان ئەم ل دووڤ خەلکێ خۆ و مللەتێ خۆ دچین و ل دووڤ داخوازیا بینەر و گۆهدارێن خۆ دچین کا وان چ جۆرە ستران دڤێن، گەلەك کەس یێن هەین دل بریندارن و عاشقن، حەز ژ سترانێن کەیفێ ناکەن بەلکو حەز ژ سترانێن خەمگین دکەن، ئەو سترانێن ڕۆندکان ژ چاڤێن مرۆڤی د ئیننە خوار و هەستێن مرۆڤی دلڤینن، و هندەك یێن هەین حەز ژ سترانێن کەیفێ دکەن وەکو سترانێن بلەز و یێن داوەتان.
گۆت ژی:»تشتێ ب سەرێ من هاتی من نەکرییە ستران، بەس یێ ب سەرێ خەلکێ هاتی من کرییە ستران، ل دەستپێکێ مە ناڤێن کەسان د سترانان دا بکاردئینان، چ ناڤ بیت یان نێزیکی ناڤی بیت، بۆ نموونە سترانەکا من ل سالا 1972 ل دەستپێکێ ناڤێ وێ ئەزم نازدارا بەرواری بوو، پاشان من گوهۆری و ناڤێ وێ کرە ئەزم نازدارا ڤی واری، چۆنکی چێنابیت مرۆڤ ناڤێ کەسەکێ یان عەشیرەکێ د سترانێ دا بینیت، لەوڕا من گوهۆری و گۆهارتنەکا دجهێ خۆ دا، و ئەڤ سترانە ب شێوێ دوو قۆلی کچ و کۆر دبێژن، ئەڤ سترانە چیڕۆکا عەشق و ڤیانا من دئینیتە بیرا من، و ئەز گەهشتم وێ عەشق و ڤیانا خۆ و ژیانەکا خۆش پێکڤە دبورینین، بەرۆڤاژی هندەك کەسان کو ب شاشی هندەك کەسان دئینن، پشتی پێکئینانا ژیانا هەڤژینیێ عەشقێ ل دەف من گەشە کر، لێ ل دەف هندەکان عەشق دمریت، چونکی حەز ژێکرنا وان دبیتە خۆ پەرێسی و د ئێكدوو نا گەهن، یان ژ نەزانینێ یان ژ خشیمی یە، یان ژی ژ کەرب و عینادێ یە، ژن نعمەتەکە بۆ گەشەکرنا زەلامی، نە بتنێ ژ لایێ جوانیێ ڤە، و ژن گەلەك عاقلە و دشێت زەلامی ب ڕێڤە ببیت، و ژ چنەییێ بکەتە گەلەك و دشێت زەلامی ژ گەلەکیێ ژی بینتە خوار و بکەتە چنە».
هونەرمەند سەمیر زاخۆیی دبێژیت:»سترانا من یا بناڤێ گول سیسنا دلێ من گەلەك ناڤدار بوو، ئەز بچمە کیڤە دئیننە بیرا من و بۆ وان دبێژم ئەڤجا چ ل جڤاتەکێ دا بیت یان ئاهەنگەکێ، هندەك هەڤالێن مە یێن گەنج ل گەلەك جهان و ئاهەنگان دبێژن، ئەڤ سترانە ژ پەیڤین ئەحمەد عەرەب سلێڤانەی بوو و ژناخێ وی دەرکەتییە، و هەر کەسەك خۆ د ڤێ سترانێ دا دبینت، پشتی دایە من ئێکسەر من ئاواز کر و تۆمارکر، ل سالا 1975 ئەز ل پەیمانگەهەکێ بووم کو من ل وێرێ د خواند، من هەڤالەك هەبوو خودێ ژێ ڕازی دکتۆر ڕەمەزان دەروێش کو هەڤالێ من یێ زاڕوکینیێ بوو، هاتە دەف من و گۆت چریسکا شۆڕەشا گولانێ دەستپێکر، من ئێکسەر پێنوس و کاغەز ئینان و هەلبەستەك نڤیسی بناڤێ دیلانە و های دیلانە و دیلانا ڤان خۆرتانە، ئەڤ سترانە مرۆڤی خورت دکەت بۆ بەردەوامیا شۆڕەشێ، و ڕۆلێ هونەرمەندان ژی گەلەك بوو ژ بۆ شۆڕەشێ، چونکی هونەرمەند ژی وەکو پێشمەرگەیە، پێشمەرگە ب تفەنگێ و هونەرمەند ژی ب دەنگێ خۆ، ئێك ژ وان سترانێن بەردەوام لگەل خۆ دبێژم سترانا بناڤێ شەڤەکا درێژ و بێ هەیڤ ل بهارێ، نێزیکی چار سترانان من و گولبهارێ پێکڤە گۆتینە ل ئێزگێ کوردی ل بەغدا و ب تایبەت سترانا شرینێ تو کچا کێی ناڤدار بوو».
زێدەتر ژی گۆت:»د وی سەردەمی دا خەلك پێدڤی ب وێ چەندێ بوو کو هەر دوو هونەرمەندێن ستێر ئەردەوان زاخۆیی و ئەیاز یوسف بهێنە د قادا هونەری دا، هۆزانڤان و ئاوازدانەر بۆ دەنگێ هەر دوو هونەمەندان گەش بوون، و ڕەوشەکا دی دانە باژێڕێ زاخۆ، خەلکێ مە ل بەر دەرگەهێ تۆمارگەهان سرا دگرتن بۆ کڕینا کاسێتێن وان، د دەمەکێ کورت دا قادا سترانێ تژی کرن ژ سترانێن خۆش و بەرکەتی و سەرنج ڕاکێش و هەست لڤین، خەلكێ مە گەلەك بوونە داخبارێن دەنگێ وان، و دەنگێ وان گەهشتە هەولێر و سلیمانیێ، چونکی خەلکێ مە داخوازی ل سەر دەنگێ وان هەبوون، و هەر دوو هونەرمەند خودان ڕەوشتەکێ پاقژ و دەلال بوون، هەڤال و وەفادار بوون».
