سالێن رەش
سامی سەلیم
گەشتا دلێن وەریایی
ل وێ زارۆکینییا ئەم لێ نەژیایین
ژییێ مە سیهـ سالبوون
کەلەخێ خەونێن مە
ل سەر داربەستا هەژاریێ
تابلۆیەک تژی تراژیدی بوو.
ترس و برس
مشەختبوون و دەربەدەری
ڕەڤین و دەردەسەری
باجا گونەهەکا پیرۆز بوون.
بێدەنگبووین
بێدەنگبووین و
ل پشت دەرگەهێ بێدەنگییێ
گیانێن تژی ڤالاتی
د حەسرەتا بێبەهرییێ دا دخەندقین.
ل مەیدانا برسێ
یارییا مە
ڤێدانا گولییێن گەنمی بوو
هەناسەیێن مە
حەوینگەها تۆزێ
و دویکێلا گیفکان بوو
شەڤ
وێستگەها گازندەیێن لەشی بوو.
هێشتا.. و هێشتا..
چاڤەڕێبووین
چاڤەڕێبووین هەلاتنەک
ژییێ مە
ژ سالێن نەهامەتیان داقوتت
لێ، ئەڤرۆ
ژی بێ ناڤ و ڕەنگین
قوربانییێن هاوکێشەیەکا لەنگین.