گوهارێن نێرگزێن «گارەی»
ژینێ رێکانی
ل دەمێ تاڤزەركا ئێڤارێ
داوی رامویسانا
تاكێن چنارێن زێ چیت كرین، دكەت
و بۆ رامویسانەكا دی
خوە بەرهەڤ دكەت
هەپارێ تە
بەرەڤ من دهێت
سەمایەكا شێتانە دكەت.
دێمێ تە
یێ كەڕخی و وەستیای
وەك خیزێ
لبەر كنارێ زێی
شل و ژبەرێك چووی
ل بن پێن تارییا
كراسێ خوە دكەت ..
خیڤەتەكا «ئەرتوشی» و
ئەڤی واری
دكەتە هێلینەكا ئەبەدی.
ئو ئەز
ب كەساتییا
ئەڤیندارەكا
ب سۆریلانكی
ئەڤین ژ دلی
ڤەرچوكاندی
گەرمتر
ژ گۆریا ڤۆلكانا «چیایێ ئاگری»
بلند كری
حەز ژ تە دكەم
ب دل بەندی.
چەند پێنگاڤێن
هەپارێ تە
بەر منڤە دهێن
گڕنژینێن تە
گیانێ من
دكەتە ئاتەشگەھ
دەنگێ ئایردەیان
گولان ڕادكەتە سەمایێ
بشكۆژێن سوبەهی پێڤە دهێن
ژیانەك بتنێ
دگەل تە
تێرا عەمرێ من ناكەتن
ژ مێژە وەرە
ل ئاشۆپا عەشقەكا كویڤی
سەرگەردانم
من هاویش بكەتن
دلێك گوهۆڕینا
پێكێن مەیا ئەڤینێ دا
دو جەستەیێن فرفرۆك بین
ل هەلاتنا سپێدا
بێ خەبەر بین
بەندەمان
ببیت هەلم و
گوهارێن نێرگزێن «گارەی»
تێر خوناڤ بكەتن
دا هەردەم ب مینن
كوفی كێلێن بەژن شرین.