عەبدولغەنی شەهد بوو ڕاهێنەرێ دهۆکێ
چاڤەڕێ دهێتە كرن ل حەفتییا بهێت دەست ب هەڤڕكیێن گەڕا پێنجێ یا خولا ستێرێن ئیراقێ یا فوتبۆلێ بهێنە كرن، پشتی بۆ ماوەیێ نێزیكی دو حەفتیان هاتیە ڕاوەستاندن ژبەر پشكدارییا هەلبژارتیێ ئیراقێ د ڤاڤارتنێن پاشكۆ دەربازبوون بۆ مۆندیالا جیهانی 2026ێ دا كری.
ئەنجام و ڕێزبەندییا هەر چار یانەیێن كوردستانی د خولێ دا جودا بووینە دناڤبەرا باشی و خرابی دا بووینە، یانەیا دهۆك ئەوا د چار یاریێن بۆری دا نەشیاییە هیچ خالەكێ ب دەستڤە بینیت، پشتی دگەل ئەلگەرمە، كەرخ، شورتە و تەلەبە تووشی خوسارەتیێ بووی ل رێزا 20ێ و دووماهیێ یە، د دو یاریێن ئێكێ دا ڕاهێنەرێ بەرازیلی ڤاریاس سەرپەرشتێ هونەری یێ تیمێ بوو، دووڤدا بۆ كاتی سلێمان ڕەمەزان ڕاهێنەراتیا تیمێ كر، لێ ژبەر ڕەوشا وی دەست ژ كارێ خوە كێشا.
ڕاهێنەرێ نوو هاتە دانان
عەبدولغەنی شەهد دگەل ستاڤێ خوە یێ نوو دێ ئەركێ ڕاهێنەراتییا تیما فوتبۆلا دهۆكێ وەرگرن پشتی بۆرینا چار یارییان ژ خولێ و دوورئێخستنا یێ بەرازیلی ڤاریاس و دەست ژ كاركێشیانا سلێمان رەمەزانی ژبەر رەوشا وی یا ساخلەمیێ، دەستنیشانكرنا وی هات پشتی بۆرینا 12 رۆژان ژ ڕاوەستیانا خولێ، ڕاهێنەرێ ناڤهاتی ل وەرزێ بۆری سەرپەرشتییا تیما زاخۆ دكر، بۆ وەرزێ ئەڤ سالە دگەل یانەیا زەورا بوو لێ د گەڕا چارێ دا دەست ژ كاركێشابوو.
بۆچوونا شرۆڤەكارێ وەرزشی
لدۆر ڤێ یەكێ رۆژنامەیا ئەڤرۆ بۆچوونا وەحید رەشید شرۆڤەكارێ وەرزشی ل پارێزگەها دهۆكێ و پسپۆر دكارێ ڕاهێنەریێ دا وەرگرتییە ئەوێ گۆتی: گوهۆڕینێن ڕاهێنەرێن تیما فوتبۆلا دهۆكێ كارتیكرنا نەرێنی ل سەر تیمێ كرییە ژلایێ دەرۆنی و تەكتیكی ڤە، پشتی سلێمان رەمەزان دەست كارێ خوە كێشایی و ڕاوەستیانا خولێ دڤیابا هەرزوو كارگێرییا یانەیێ ڕاهێنەرەك دەستنیشانكربا، ژبەركو دزانن هاتنا سلێمان رەمەزانی بەروەخت بوو، لێ راوەستیانا خولێ بەر ب دووماهی دهێت و بڕیارە حەفتییا بهێت دەستپێبكەت، چو ڕاهێنەر نەهاتن دماوەیێ بۆری دا ئەڤە ژی دێ گڤاشتنێ ل سەر یانەیێ و تیمێ پەیداكەت.
هەروەسان ناڤهاتی گۆت: بڤی شێوەیی ئەڤ سالە پێشبینییا باش بۆ رێزبەندیێ ناكەم، ژبەركو دێ یاریێن بهێز هەبن و دەم بۆ دڤێت هەتا تیم بهێتە ل سەر ڕێیەكێ، هاتنا ڕاهینەرەكی پشتی بۆرینا چەند رۆژان ژ بهێنڤەدانێ و گیرۆبوونا دەستنیشانكرنا وی د بەرژوەندییا تیمێ نا نینە، جەماوەرێ وەرزشی سەركەڤتن و قارەمانی دڤین، ژبەركو ل وەرزێ بۆری دهۆكێ دو قارەمانی دەستڤەئینابوون و دڤیابا ئەڤ سالە پاراستنا یاریزان و ئاستێ خوە كربا، سرۆشتییە جەماوەر دێ گڤاشتنێ كەت، هیڤییا من ئەوە راهێنەرێ بهێت بشێت ئەنجاما بگوهۆڕیت و هەكەر نە ئینیت دێ كارتیكرن ل سەر تیمێ و كارگێریێ هەبیت ژبەركو جەماوەر تێهنیێ سەركەڤتنانە.
وەحید رەشید ئەوچەندە ژی گۆت: ل وەرزێ بۆری و هەتا چەند یاریێن ڤێ وەرزی پربوونا پەلۆكێن جەماوری بۆ دەستكەڤتان ڤەدگەریا، ترسا مە ئەوە هەكە دهۆك بەردەوامبیت دێ ڕێژەیا جەماوەری بەر ب كێمبوونێ ڤە چیت، یا دروست ئەوبوو دەمێ ئینانا ڕاهێنەرەێ بەرازیلی دڤیابا هەتا 5 یاریان دەلیڤە دابایێ چوونا وی شاشی بوو.
ژلایەكێ دووڤە خۆیاكر ئەو ڕاهێنەرێ دهێت ژی دبیت نەشێت ددەمێ خوە دا تیمێ دروست بكەت و ئەنجامان ب گوهۆریت ودێ چاڤەڕێ بن هەتا ڤەگوهاستنێن زڤستانێ و یارییا هەڤالینی یا دوهی چو مفا نینە بتنێ چەستەیی بۆ یاریزانان نەبیت ژبەركو راهێنەرێ دهێـت دێ ستافێ خۆ ئینیت و هزر و پلانێن خوە هەنە.