من پشکداری د گەلەك ئاهەنگ و کۆنسێرتان دا کریە
زاخۆ، دلۆڤان هالۆ:
مۆزیکژەنێ دەست زێڕینێ ئیدارا سەربخوە یا زاخۆ خێڤان زاخۆیی د دیدارەکێ دا بۆ ڕۆژناما ئەڤرۆ دیار کر کو ل دەستپێکێ مە ب شێوەیەکێ کولانکی ئامیرێ تەمبیرێ دژەنی ژ ڤێ کولانێ بۆ کولانە هە، لێ پشتی هینگێ هێدی هێدی دەستێ مە کەت سەر ئامیرێ تەمبیرێ و ئەم فێربووین و مە مۆزیکا هندەك سترانان ژبەرکر و دژەنی.
ناڤهاتی ئاماژە ب وێ چەندێ ژی کر کو ل ئاهەنگا نەورۆزا سالا 1987 برایێ من لگەل ئەردەوان زاخۆیی و ئەیاز یوسڤی مۆزیکژەن بوو و ئامیرێ تەمبیرێ لگەل بۆ وان دژەنی، ئەز ژی ل گەل خێزانا خۆ چوومە وێ ئاهەنگێ، پشتی کو ئاهەنگ ب دووماهیك هاتی برایێ من و هونەرمەند حاجی زاخۆیی و سەباح زاخۆیی ئەز ل وێرێ دیتم، برایێ من گۆتە وان ئەڤە برایێ من یێ بچووکە، و ئەو ژی وەکو من ئامیرێ تەمبیرێ دژەنیت و ژەنینا وی یا باشە ژی.
گۆت ژی:»هەر ل وێ ئاهەنگا نەورۆزێ هونەرمەند سەباح زاخۆیی گۆتە برایێ من پاشی برایێ خۆ خێڤانی بینە دەف مە ل بنگەهێ لاوان ل زاخۆ، مە گڕۆپەك یێ هەی ژ سترانبێژ و مۆزیکژەنان پێك دهێت، ئەم دێ وی ژی کەینە د وی گڕۆپی دا، ئەندامێن وی گڕۆپی ئەڤە بوون ئەز و هونەرمەند عەبدولقهار زاخۆیی و هاوار میکائیل و عیماد عەلی و ئازاد شەمسەددین و نزار سەعید و سەعەد عەبدولڕەحمان، ڤان کەسان چەندین ئامیرێن مۆزیکێ یێن وەکو ئۆرگ و تەمبیر و کەمان و چەندین ئامیرێن دی دژەنین، و ئەم بۆ ماوەیەکێ ماینە لگەل ڤی گڕۆپی، و ئەز پتر شەهرەزا بووم و ب ڕژدی مە دەست ب مۆزیکێ کر.
زێدەتر ژی گۆت:»پشتی گڕۆپێ مە یێ مۆزیکێ ژی مە بەردەوامی دا کارێ خۆ یێ مۆزیکێ و ڕۆژ بۆ ڕۆژێ ئەز شارەزا تر بووم و ژەنینا مە یا ئامیرێ تەمبیرێ باشتر بوو، لەوڕا من پشکداری د گەلەك ئاهەنگ و شەهیان و کۆنسێرتان دا کر لگەل چەندین هونەرمەندێن دەڤەرێ، هەر دیسان وەکو مۆزیکژەن من پشکداری د تۆمارکرنا سترانێن گەلەك هونەرمەندان دا کر».
